На предлог на Министерството за транспорт и врски Владата на денешната 63. седница ја дополни Уредбата со законска сила за примена на Законот за градежно земјиште за време на вонредна состојба, која се однесува на плажите кои беа предмет на закуп.
Со дополнувањето на Уредбата се задолжува закупецот да го врати во првобитна состојба градежното земјиште кое било предмет на краткотраен закуп предвидено со урбанистички план или урбанистичко-планска документација за плажа, а за кое временскиот рок за краткотраен закуп е истечен или договорот за краткотраен закуп е предвремено раскинат, се вели во соопштението од владината прес-служба.
Договорите за закуп на плажите на охридското крајбрежје, кои ги обврзуваа концесионерите да плаќаат надомест за користење на општините, во најголем дел се истечени во 2014, 2016 година и во 2017 година.
Минатата година државата најави преземање на плажите на охридско-струшкото крајбрежје од општините, поради, како што беше образложено, неможноста тие да воведат ред и контрола.
Општина Охрид ја поддржа иницијативата на Министерството за транспорт, додека градоначалникот на Струга Рамиз Мерко беше против, бидејќи смета дека локалната самоуправа е таа што треба и натаму да стопанисува со плажите.