Со измена на Уредбата за финансиска поддршка на приватниот сектор, за два месеца е намелен периодот во кој компаниите што од државата ќе добијат по 14 500 денари по вработен за април и за мај, ќе имаат обврска да го задржат истиот број вработени
Компаниите што ќе ги користат мерките на владата за помош на стопанството нема да мора да ги задржат сите вработени до септември, туку заклучно со јули.
Намалувањето на рокот за два месеца е предвидено со измени на владината Уредба за поддршка на работодавачите од приватниот сектор, погодени од здравствената и економска криза во земјава. Измените на Уредбата, која предвидува помош за исплата на платите во приватниот сектор, на ниво на минималец, се донесени на денешната владина седница. За тоа информира министерката за финансии Нина Ангеловска, која сподели на фејсбук дека истата бројка на вработени треба да се задржи два месеца по користењето на мерката за поддршка со минимална нето-плата по вработен за април и за маj.
Од Владата информираат дека Уредбата за поддршка на работодавачите од приватниот сектор заради исплата на плати за април и за мај 2020 година, се дополнува со условот дека бројот на вработени треба да се задржи два месеци по користење на мерката, односно до јули 2020 година.
„За оваа мерка компаниите не може да аплицираат единствено за свои вработени за кои се ослободени од плаќање придонеси и персонален данок преку проектите ‘Македонија вработува’ или доколку се одлучат да ја искористат мерката за субвенционирање на 50 проценти од придонесите во вонредна состојба, која е дел од првиот сет на мерки за справување со кризата“,
се наведува во соопштението од Владата.
Кон крајот на март, Владата промовира сет мерки за надминување на економските последици од кризата. Мерките предвидуваа минимална плата за вработените во компаниите погодени од ситуацијата со коронавирусот, но и кратење на сите финкционерски плати на ниво на минималец. Тогаш беше кажано дека работодавачите што ќе ги користат овие мерки, ќе мора да го задржат истиот број вработени до септември годинава.
Во меѓувреме реагираа дел од компаниите, а со соопштение се јави и Стопанската комора која побара флексибилност од Владата токму во однос на одредбата за задржување на сите вработени до септември. Дилемите што во овој контекст ги наметна Стопанската комора беа: што ако во предвидениот период некој самоволно си замине од компанијата, што ако некој направил сериозна повреда на работните обврски, што ако компанијата има вработени на пробна работа на кои договорот им истекува во јуни, а не сака да им го продолжи договорот заради несоодветно извршување на работните задачи…?