Од Владата посочуваат идека му благодарат на Бучковски за сите ангажмани и напори со кои придонесе кон одржувањето на добрососедските и пријателските односи помеѓу двете држави
Новите премиери на Северна Македонија и Бугарија, Димитар Ковачевски и Кирил Петков ќе ги утврдат начините и чекорите на решавањето на отворените прашања помеѓу двете држави, велат од Владата во изјава за МИА, по разрешувањето на универзитетскиот професор Владо Бучковски од позицијата специјален владин претставник за Бугарија.
„Се очекува, согласно разговорите меѓу премиерите на двете држави и меѓу мандатарот за премиер Ковачевски и премиерот на Бугарија Петков, двајцата нови премиери согласно заеднички утврдена методологија да ги утврдат начините, ресурсите и чекорите кон конечно решавање на отворените прашања, потпирајќи се на условите и успесите постигнати од сите чинители во досегашните процеси“,
велат од Владата.
Од Владата посочуваат и дека му благодарат на Бучковски за сите ангажмани и напори со кои придонесе кон одржувањето на добрососедските и пријателските односи помеѓу Северна Македонија и Бугарија во време на предизвици кои подразбираа потреба од мудар, трпелив и посветен однос кон барањето решенија.