За ова на својот фејсбук-профил денеска информира министерот за економија Крешник Бектеши кој посочи дека оваа одлука има за цел да влијае на стабилизација на цените на основните прехранбени производи, а ќе биде во сила до 31 декември 2022 година
Маржите на основните прехранбени производи ќе останат ограничени до крајот на годината, одлучи Владата на денешната седница, на претходен предлог на Министерството за економија.
За ова на својот фејсбук-профил информира министерот Крешник Бектеши кој посочи дека оваа одлука има за цел да влијае на стабилизација на цените на основните прехранбени производи, а ќе биде во сила до 31 декември 2022 година.
“Имајќи предвид дека со оваа Одлука се ограничува растот на цените преку утврдување на висината на трговската маржа која треба да влијание на растот на цените на мало на основните прехранбени производи, а состојбата на пазарот укажува дека цените не се стабилизирани, се наметна потребата да се продолжи рокот за следните 3 месеци од оваа година односно до 31 декември 2022 година. На овој начин, евентуалниот раст на цените во трговијата на големо и трговијата мало ќе биде предизвикан од растот на увозните и берзанските цени, како и растот на производствените трошоци“,
напиша министерот Бектеши на својот Фејсбук-профил.
Според одлуката, висината на трговска маржа на белиот леб – сечен на парчиња или цел, белиот шеќер и сончогледовото масло за јадење се утврдува во висина до 5 проценти во трговијата на големо и до 5 проценти во трговијата на мало.
На 10 проценти, пак, во трговија на мало и трговија на големо се ограничува трговската маржа на брашно од пченица – тип 400 и тип 500, макарони и шпагети од тврда пченица, македонски бел ориз и трајно кравјо млеко со масленост од 2,8%, 3,2% и 3,5% млечна маст и јајца.
Одлуката на Владата следува откако вчера министерот Бектеши најави дека до Владата ќе предложи продолжување на мерката за ограничени маржи на основните продукти до крајот на годината.
Владата на 14 јуни донесе Одлука за замрзнување на маржата на основните прехранбени производи во трговијата на мало и на големо со важност до 30 месецов. Според одлуката маржата за бел леб, шеќер и сончогледово масло е пет отсто во трговијата на големо и на мало, а за јајца, брашно, макарони и шпагети од тврда пченица, бел ориз и млеко 10 отсто.