Задржувањето на летното сметање на времето ќе предизвика зголемена потрошувачка на топлинска енергија од 1,5 – 3,5 отсто за грејната сезона
Владата на денешната седница одлучи зимава, сепак, да нема промена во досегашниот систем на сметање на времето, односно, како и секоја година во последната недела од октомври, и викендов стрелките на часовникот ќе се поместат еден час назад, со што ќе почне зимското сметање на времето.
Од Владата информираат дека според пресметките за потребна топлина и анализата на промените на надворешните температури на часовно ниво, воочено е дека задржувањето на летното сметање на времето ќе предизвика зголемена потрошувачка на топлинска енергија од 1,5 – 3,5 отсто за грејната сезона. Согласно направената анализа на движењето на температурите во утринските часови и пресметките за потребна топлина за загревање, заклучено е дека со враќање во зимско сметање на времето ќе се заштеди на потрошувачка на електрична и топлинска енергија.
Во соопштението од владината прес-служба се наведува дека била разгледана информацијата од Министерството за економија кои проценките ги правеле во соработка со министерствата за финансии, за внатрешни работи, за образование и наука, за труд и социјална политика, како и со Агенцијата за електронски комуникации, Биро за метрологија, Стопанска комора на Северна Македонија, Управа за хидрометеоролошки работи, Стопанска комора на северозападна Македонија и Економскиот факултет – Скопје.
Секои шест месеци во земјава, како и во другите земји од континентот, граѓаните поминуваат низ ритуалот на поместување на стрелките на часовникот за еден час нанапред (ако станува збор за премин од змиско во летно сметање на времето) и еден час наназад (ако часовникот се враќа на зимско сметање).