Владата не сака да ја коментира изјавата на генералниот секретар на Алијансата за Албанците, Арбен Таравари, кој вчера обвини дека надворешната политика на Северна Македонија не е усогласена со онаа на ЕУ во однос на санкциите кон Русија.
На прашање за коментар на ваквите обвинувања од опозициската партијата, од Владата потенцираат дека земјава останува посветена на патот кон ЕУ.
„Владата не сака да ги коментира изјавите на политичките партии, но сакаме да истакнеме дека Република Северна Македонија останува посветена на нејзиниот пат кон интегрирањето во ЕУ. Република Северна Македонија е членка на НАТО додека одиме понатаму кон членство во ЕУ. Продолжуваме со спроведување на сите реформи кои се потребни внатре во нашата земја со цел еден ден да бидеме дел од европското семејство“,
вели портпаролот на Владата, Муамед Хоџа.
Таравари вчера се обрати во името на Алијанса за Албанците и на Алтернатива потенцирајќи дека откако Зоран Заев стана премиер, Советот на ЕУ донел 21 одлука за продолжување и проширување на санкциите против Русија, но Владата исто толку пати одбила да воведе санкции против Русија.
„Ова е загрижувачки тренд на ова Влада! Од друга страна ја имаме Албанија и Црна Гора кои потполно се на иста линија со ЕУ. Додека, од друга страна ја имаме Северна Македонија на Зоран Заев и Србија на Вучиќ, кои одбиваат санкции против Русија. Но тоа што најмногу нè загрижува во овој случај, е фактот што Министерството за надворешни работи го води министер – Албанец, кој нè стави на страна на Вучиќ, Додик и Путин“,
посочи Таравари.