„Призма“ вчера објави дека, заштитувајќи ја „приватноста“, Владата под контото 425990 што се води како „други договорни услуги“ во декември 2020 исплатила 58 фактури, а имињата на ангажираните се скриени
Не исклучуваме можност, во консултација со со надлежните институции за заштита на лични податоци и за пристап до информации од јавен карактер и ако е дозволено, во духот на трансарентноста, ќе ги објавиме имињата на сите тие лица што веќе се ангажирани како хонорарци во Владата.
Вака денеска одговори владиниот портпарол Мухамед Хоџа на новинарско прашање дали Владата ќе ги објави имињата на ангажираните хонорарци, за кои објави „Призма“.
Хоџа инсистираше на тоа дека тие не се тајни ниту анонимни, туку се ангажирани според одредби за лица од надвор со специфични ангажмани, но притоа не кажа за какви ангажмани се работи.
„Нема ниту тајни, ниту анонимни хонорарци, ниту тајно ангажирани административни службеници. Точно се знае за што Владата ангажирала физички лица надвор од редот на вработените, за кој временски период, со колкав финансиски надомест. Тие ангажмани се строго професионални и се реализираат во целост. Тоа се специфични ангажмани кои не може да се реализираат од редот на вработените и за нив не може да се отвори редовен работен однос и затоа се ангажирани привремено“,
одговори владиниот портпарол.
„Призма“ вчера, врз основа на фактурите добиени преку Барање за слободен пристап до информации од јавен карактер што биле исплатени преку авторската агенција „Артпицк“ за декември 2020 година, објави дека Владата лани во декември ангажирала 58 луѓе, ама за разлика од вработените што се наведени со име и презиме, овие хонорарци се скриени, па, и покрај сите декларирани заложби за транспарентност, Владата инсистира тие да останат – анонимни.
Проверката на БИРН покажа и дека износите на овие месечни фактури се повторуваат. Па така, не само во декември 2020 туку и во годините претходно и во месеците потоа, исти или слични износи биле исплаќани за оваа ставка.
Во истражувањето се заклучува дека оваа ставка е широко сметководствено покритие за под тој назив да се исплаќаат хонорари за разни услуги, а потврда за тоа е што само за две години, односно од 2019 до 2020 година, преку ова конто се исплатени над еден милион евра.
Целото истражување прочитајте го на „Призма“.