На дневен ред на денешната редовна седница на македонската Влада е и информација за санкциите на ЕУ кон Русија, со препорака за приклучување на нашата земја кон мерките
Потребата од евакуација на македонски државјани од Украина, по денешната руска инвазија, како и пакетот мерки на ЕУ против Москва се точки на дневен ред на денешната седница на македонската Влада.
Од Владата соопштија дека на оваа редовна седница на разгледување и усвојување е информацијата за новиот пакет рестриктивни мерки на ЕУ во поглед на ситуацијата во Украина, со препорака за придружување на Северна Македонија кон сите одлуки на ЕУ за овој вид рестриктивни мерки.
Министрите денеска ќе разгледаат и информација за потребата од обезбедување сместување на државјани на Северна Македонија и членови на нивните семејства по нивна евакуација од Украина.
Седницата на Владата почнува во 11 часот. За 14 часот, пак, претседателот Стево Пендаровски свика седница на Советот за безбедност за ситуацијата со руската агресија врз Украина.