Дозите за возрасните треба да почнат да се испорачуваат од мај, а тие за деца во првите три месеци од 2022 година
Владата денеска ја усвоила информацијата да се купат нови 500 000 дози вакцини против ковид-19 од производителот „Фајзер“ во наредната година, соопштија од владината прес-служба.
Од овие пола милион дози, еден отсто или околу 10 000 дози ќе бидат за деца на возраст од пет до 12 години.
„Согласно информацијата дозите за возрасните да почнат да се испорачуваат од месец мај, а педијатриските дози во првото тримесечје на 2022 година, а вкупната количина треба да се испорача до декември 2022 година. Набавката на оваа количина вакцини против ковид-19 за 2022 година е заради заштита на јавното здравје и за рестартирање на економијата како јавен интерес“,
велат од Владата.
Вакцината на „Фајзер“ претходно беше одобрена за деца од пет до 12 години и од Агенцијата за храна и лекови на САД (ФДА) и од Европската агенција за лекови (ЕМА).
ЕМА даде зелено светло кон крајот на ноември со што разликата во дозата за возрасните и кај таа за деца од пет до 12 години е во јачината. Кај децата дозата е послаба односно 10 микрограми во споредба со дозата што се користи за останатите – 30 микрограми.