Одлуката за замрзнување на маржата се однесува на млечните производи – урда, кравјо бело сирење и мешано бело сирење, кашкавал, кисело млеко и павлака и јогурт. Највисоката трговска маржа на овие производи се ограничува до десет отсто во трговијата на големо и трговијата на мало
Со укинувањето на ограничувањето на извозот на пченица се исполнува и обврската од Договорот за безбедносни механизми за храна во Западен Балкан, потпишан на 2 септември годинава, на Самитот на Отворен Балкан, велат од Владата
Владата на денешната 87. седница донела одлука за замрзнување на маржата за млечните производи – урда, кравјо бело сирење и мешано бело сирење, кашкавал, кисело млеко и павлака и јогурт, за кои, како што соопшти владината прес-служба, се органичува највисоката трговска маржа до десет отсто во трговијата на големо и трговијата на мало.
Одлуката, информираат од Владата, е дополнување на одлуката за посебни услови за трговијата на одделни стоки, а е донесена на предлог на Министерството за економија.
„При редовна контрола на Државниот пазарен инспекторат (ДПИ) во трговијата на мало и трговијата на големо, според Информацијата од Министерството за економија, укажано е на потребата од интервенција кај наведните стоки, поради растот на нивните цени. Како што е познато, од 14 јуни 2022 година, утврдено е замрзнување на маржите на основните прехранбени производи: леб (бел), шеќер (бел), сончогледово масло за јадење (без ладно цедено масло), брашно од пченица (тип 400 и тип 500), макарони и шпагети од тврда пченица, македонски бел ориз и трајно кравјо млеко со масленост од 2.8 проценти, 3.2 процента и 3.5 проценти, со трговска маржа со важност до 31 декември 2022 година“,
се наведенува во соопштението од владината прес-служба.
На Владината седница, што се одржала попладнево преку видео-конференциска врска, била донесена и одлука за престанок на важење на одлуката за ограничување на извозот на одделни стоки.
Одлуката за ограничување на извозот се однесуваше на пченица и наполница, брашно од пченица и наполица и семе од сончоглед (кршено или дробено).
„Во предлогот на Министерството за економија за прекин на нејзината важност, донесен, како што е посочено, во соработка со Министерството за земјоделство, шумарство и водостопанство, се исполнува и обврската од Договорот за безбедносни механизми за храна во Западен Балкан, потпишан на 2 септември 2022 година, на Самитот на Отворен Балкан, одржан од 1 до 4 септември 2022 година во Белград, а со цел да нема забрана за тргување со основните земјоделско-прехранбени производи“,
стои во информацијата од Владата.