Инаку, за прашањето за евентуален влез на унгарски „4iG“ во Северна Македонија како трет мобилен оператор, во услови кога има има стратешко партнерство со кинескиот производител „Хуавеј“, во изминатиот период известуваше „360 степени“. Во објавите потсетивме дека земјава во 2021 година го смени законодавството за да оневозможи влез и користење опрема од небезбедни производители, меѓу кои се вбројува и „Хуавеј“ што, пак, се случи откако кон крајот на 2020 година, владата на Зоран Заев и владата на САД, во мандатот на претседателот Доналд Трамп, потпишаа меморандум кој предвидува пристап на чисти и доверливи производители на 5Г-мрежи
Владата и унгарската телекомуникациска групација „Фор-ај-џи“ (4iG) денеска во Скопје потпишаа Меморандум за разбирање со цел, како што соопшти владината прес-служба, да се забрза дигиталната трансформација во државава во делот на економијата и инфраструктурата.
Од Владата најавија дека во следниот период двете страни ќе формираат заедничка работна група за унапредување на соработката, со цел да се анализираат можностите на пазарот и да се забрза соработката.
Меморандумот, како што информираа од Владата, го потпишаа заменик-претседателот на Владата и министер за транспорт, Александар Николоски, и претседателот на „4iG“ групацијата, Гелерт Жазаи.
Од Владата велат дека ова претставува основа за долгорочна соработка и ги истакнува можностите за влез на „4iG“ групацијата на телекомуникацискиот пазар во државава.
„Документот, кој ја поставува основата за долгорочна соработка меѓу двете страни, ги потенцира можностите за ‘4iG’ групацијата за влез на телекомуникацискиот пазар во Македонија и ги дефинира заедничките цели за идната соработка и тоа: подобрување на искуството на клиентите преку воведување на најсовремени мобилни и широкопојасни технологии за да се обезбедат побрзи и посигурни комуникациски и интернет услуги, имплементација на инвестиции во врвни технологии засновани на 5G, IoT и вештачка интелигенција за развој на дигиталниот екосистем во Македонија со оглед на посветеноста на Владата за иницијативата ‘Чиста мрежа’, итворање на нови и квалитетни работни места преку формирање на регионални канцеларии и оперативни центри кои ќе имаат за цел зголемување на економскиот раст и долгорочен развој, минимизирање на влијанието врз животната средина и поддржување на зелените иницијативи, стимулирање на иновациите, технолошкиот развој и претприемништвото во партнерство со локални економски субјекти“,
информираат од владината прес-служба.
Според Владата, Меморандумот за разбирање потпишан со „4iG“ групацијата е целосно во согласност со „Планот за одржливост на Македонија 2030“ и посветеноста на државата за програмата „Чиста мрежа“
Министерот Николоски на 6-ти месецов ја информира Владата на седница дека е пристигнато писмо со намери од унгарскиот оператор „4iG“ групација, откако тој претходно во Будимпешта оствари средба со претседателот на групацијата Гелерт Жасзаи.
Инаку, за прашањето за евентуален влез на унгарски „4iG“ во Северна Македонија како трет мобилен оператор, во услови кога има стратешко партнерство со кинескиот производител „Хуавеј“, во изминатиот период известуваше „360 степени“. Во објавите потсетивме дека земјава во 2021 година го смени законодавството за да оневозможи влез и користење на опрема од небезбедни производители, меѓу кои се вбројува и „Хуавеј“ што, пак, се случи откако кон крајот на 2020 година, владата на Зоран Заев и владата на САД, во мандатот на претседателот Доналд Трамп, потпишаа меморандум кој предвидува пристап на чисти и доверливи производители на 5Г-мрежи.
Вицепремиерот Николоски изјави дека ако владата реши да оди со трет мобилен оператор, основен услов за да влезе на пазарот, е да доаѓа од земја членка на Европската Унија или на НАТО и исклучиво да користи чиста технологија.
„Две работи сакам да кажам. Прво, дали ќе одиме со трет мобилен оператор или ќе најдеме друг начин да се намали цената на услугите е прашање коешто треба да го одлучиме како влада, но исто така знам дека основен услов, доколку одиме со трет оператор, ќе биде операторот да е од земја членка на Европската Унија или НАТО и да користи исклучиво технологија којашто е т.н. чиста затоа што има закон во Македонија и одобрена од НАТО, со строга забрана за користење на руска, кинеска, индиска или која било друга технологија којашто не е одобрена од Алијансата“,
рече министерот за транспорт.
Во однос на групацијата „4iG“, Николоски рече дека тие што ја напаѓаат треба да проверат кој е еден од нејзините сопственици.
„Еден од сопствениците на ’4iG’ е најголемата воена индустрија од Германија ’Рајнметал’ (Rheinmetall) којашто ги произведува, меѓу другото, тенковите ’леопард’. Така што, кога се спремаат да нè напаѓаат треба малце повеќе да се спремаат од овие два оператора, повеќе да читаат и да нè напаѓаат преку свои прокси-играчи во јавност, а мислам дека дури трошат време и енергија да ме напаѓаат мене, премиерот Мицкоски, владата, можеби е подобро да потрошат време и енергија да ги намалат цените и да дадат поевтини услуги на граѓаните“,
рече Николоски во интервју за Сител.
Претходно, говорејќи за дуополот, тој кажа дека актуелните оператори во земјава, идеално го имаат поделено пазарот поради што граѓаните и фирмите плаќаат поскапи цени за услугите. Според Николоски, ова е суштината на проблемот кој сакаат да го решат како Влада.
Партнерството меѓу унгарскиот оператор „4iG“ и кинески „Хуавеј“ датира од октомври 2023 година, за чие склучување известија не само медиумите, туку и самата „4iG“.
„360 степени“, пак, уште летото 2020 г. објави дека тогашната влада на премиерот Заев, по контакти со американски претставници, побарала од најголемиот телекомуникациски оператор „Македонски телеком”, во кој државата има речиси 35 проценти удел, да ја преиспита намерата за купување нова опрема за 5Г-мрежа токму од „Хуавеј“. Зделката со „Хуавеј“ пропадна, а наместо кинеската фирма во игра влезе „Ериксон“, кој на „Македонски телеком“ му продаде опрема за 5Г-мрежа вредна 45 милиони евра. Таа е во функција од февруари 2022 г.
За можноста за влез на унгарски „4iG“ на пазарот во Северна Македонија, „360 степени“ побара став и од Амбасадата на САД во земјава.
„Веруваме дека владата ќе продолжи да го штити интегритетот на мрежата, да избегнува недоверливи добавувачи на хардвер и софтвер и да обезбедува сигурен и етички 5Г-екосистем во Северна Македонија“,
рекоа од Амбасадата на САД во Скопје.