Владата вечерва во соопштение ги појаснува измените поради кои ги повлекла вчера поднесените законски репенија за ЈО и за СОвет на јавни обвинители.
Од Владата истакнуваат дека на вчерашната седница на која се разгледувале текстовите биле изнесени сугестии од министерката за финансии, Нина Ангеловска, од Секретаријатот за законодавство и од вице-премиерот Бујар Османи и биле внесени корекции кои се однесуваат на финансирањето на Јавното обвинителство и усогласување на стапувањето во сила со примената на законот.
Со тие дополнувања предлог законот за ЈО бил доставен до Собранието, но во текстот кој што е пратен биле направени ситни технички грешки кои се однесуваат токму на корекциите усогласени на седница на Владата.
„Од тие причини испратениот текст на Предлог-законот за јавното обвинителство е повлечен. Владата по направените исправки повторно го достави до Собранието на Република Северна Македонија“, велат од Владата.
Што се однесува до Предлог-законот за изменување и дополнување на Законот за Советот на јавните обвинители, од Владата велат дека имало повеќе предлози за негова измена.
„Во текот на дебатата на седницата на Владата беше прифатено додавањето на упатна норма на Законот за употреба на јазиците и додавање на двојното гласање за изборот на јавните обвинители во Основното јавно обвинителство за гонење на криминал и корупција. Во текстот што беше испратен до Собранието беше испуштена упатната норма на Законот за употреба на јазиците, а одредбата за двојното гласање беше непрецизно формулирана“, се вели во соопштението од владата.
Предлог-законот за изменување и дополнување на Законот за Советот на јавните обвинителие повлечен, со цел да се испрати законски текст со содржина каква што е усвоена на седницата на Владата, се додава во соопштението.
Собраниската седница за коригираните законски решенија е закажана за 22 часот.
Поврзана вест: Нема политичка неусогласеност во законите за ЈО и за Совет на обвинители – седницата закажана за 22 часот