Македонската асоцијација на медиуми (МАН) ја обвини владата дека со правото на вклучување во живо на прес конференциите врши селекција на медиумите. Од Владата велат дека податоците ги зела од регистрите на медиуми во државата, а во нив не се порталите Курир, Република, Лидер, Инфомакс, Нетпрес, Вечер…
Владата не врши селекција, ниту регулира, ниту интервенира во медиумските регистри, туку се потпира исклучиво на постоечки регистри кои ги создале независни регулаторни тела и професионални медиумски организации, се вели во владиното соопштение кое е реакција на забелешката од Македонската асоцијација на новинари (МАН) на одлуката на Владата, право на онлајн-вклучување на прес-конференциите да имаат „сите медиуми кои се регистрирани во регистарот на АВМУ ( Регистар на професионални онлајн медиуми), како и сите онлајн-медиуми од Регистарот на Советот за етика во медиумите на Македонија и Здружението на новинари на Македонија (Регистар на професионални онлајн медиуми)”.
Во регистарот на онлајн-медиуми наведен од Владата не се порталите Курир, Република, Лидер, Инфомакс, Нетпрес, Вечер…
„Владата уште минатата година го поздрави процесот на саморегулација во сферата на онлајн медиумите и најави дека ќе го почитува регистарот на професионални онлајн медиуми на СЕММ и ЗНМ, исто како што го почитува регистарот на АВМУ. Во време на вонредна состојба, кога граѓаните будно ги следат вестите во живо, Владата мора да обезбеди точно да се знае кој се вклучува во живо за време на прес-конференциите, а нема подобар начин да се следат критериуми и стандарди, од тоа да се земат предвид постоечките регистри на професионални медиуми, кои секако не ги креира Владата“, се вели во писмената реакција.
Од Владата посочуваат дека најновата најавена можност за онлајн видео вклучување е достапна за сите медиуми кои се наоѓаат на постоечките регистри на институциите и медиумски организации, односно АВМУ, СЕММ и ЗНМ, кои како што се вели, се единствените институции и медиумски организации кои водат регистри на медиуми во земјата, со вкупна бројка од 234 медиуми од четирите достапни регистри, односно 72 радио станици, 48 телевизии, 13 весници и 101 онлајн портали.
Исто време, од Владата укажуваат дека секојдневно се најавуваат прес-конференции, а поставувањето на прашањата е со директна покана која се испраќа до околу 700 медиумски работници, членови на различните новинарски здруженија во земјава, вклучително и ЗНМ и МАН.
„Никој не е исклучен, секој еден новинар, граѓански новинар, блогер, па и граѓанин, може да ги постави прашање“, велат од Владата и ги повикуваат сите новинари и сите медиуми да ги искористат можностите, да ги следат прес-конференциите на интернет и да ги постават своите прашања преку различните воспоставени канали на комуникација.
Во владиното соопштение уште еднаш се наведуваат начините на кои може да се комуницира со владините претставници и институции, во овој период додека трае кризата со коронавирусот:
1. Интернет видео стрим во живо од секоја прес-конференција на каналот Јутјуб, на македонски и на албански јазик, достапен за сите граѓани со интернет конекција;
2. Интернет видео стрим во живо на секоја прес-конференција на социјалната мрежа Фејсбук, достапен за сите граѓани со интернет конекција;
3. Можност за преземање на видео содржините кои одат во живо од страна на сите телевизии, радија и интернет портали;
4. Можност за сите заинтересирани новинари, медиуми и граѓани за преземање јавно достапни текстуални соопштенија, фотографии и видео материјали од сите прес-конференции и јавни активности на Владата, достапни на www.vlada.mk;
5. Можност за сите новинари да поставуваат прашања преку е-пошта, при што најголем дел од прашањата се одговараат во живо на прес-конференциите, а помал дел со писмен одговор преку е-пошта;
6. Можност за онлајн видео вклучување во живо за време на прес-конференциите за сите медиуми од регистрите на медиуми кои постојат во Северна Македонија.