Владата на денешната седница ја усвоила информација за прогласување на дел од Шар Планина за заштитено подрачје во категоријата национален парк. Оттаму велат дека мислење треба да дадат сите сектори вклучени во подготовката за определување на статусот национален парк и потоа Министерството за животна средина (МЖСПП) да испрати усогласен предлог до Владата.
„Согласно информацијата на Министерството за животна средина, Владата им препорача на сите сектори вклучени во подготовката за определување на статусот национален парк (економија, шумарство, ловство, енергетика, транспорт, одбрана, туризам и др.), во рок од 15 дена да го достават своето мислење, по што МЖСПП ќе достави усогласен предлог до Владата на Република Северна Македонија за донесување Одлука за прифатливоста на предлогот за прогласување на дел од Шар Планина во категоријата национален парк“,
соопшти Владата на РСМ.
Со години се ветувањата дека Шара ќе биде прогласена за национален парк. Еколошките друштва долго време бараат да се заштити планината, оти дивоградби никнуваат на секој чекор, дивосечата на шумата е масoвна, а стравуваат и од изградба на низа хидроцентрали. Доколку добие статус на национален парк, на Шара ќе бидат забранети градежни потфати, експлоатација на природните ресурси и менување на теренот, и ќе се користи исклучиво за рекреација и еколошки активности.
Шара е еден од најголемите и највисоките планински масиви во Македонија. На косовската страна, планината го добила статусот заштитен парк пред 30 години.