Формираното тело, како што појаснуваат од владата, ќе дава мислење за карактерот на историските личности, односно на начинот на кој ќе се формираат, со цел да се избегне злоупотреба на одредени личности кои имаат негативен контекст низ различни историски епохи
Владата информира дека по предлог на Министерството за правда, на денешната владина седница е усвоена информацијата за формирање меѓуресорско, ад хок тело како привремено решение до донесување на нов Закон за здруженија и фондации.
„Со оглед на тоа што Министерството за правда не води Регистар на историски личности, постои потреба од преодно решение за барањата поднесени од страна на здруженијата кои во името имаат историска личност“,
информираат од владата.
Формираното тело, како што појаснуваат од владата, ќе дава мислење за карактерот на историските личности, односно на начинот на кој ќе се формираат, со цел да се избегне злоупотреба на одредени личности кои имаат негативен контекст низ различни историски епохи.
Претходно денеска, одговарајќи на новинарско прашање дали може да се спречат формираните бугарски здруженија во земјава, министерот за правда Никола Тупанчески оговори дека на денешната седница на Владата ќе предложи формирање на ад хок тело како привремено решение, до донесување на нов закон за здруженија и фондации.
Во таа насока, министерот посочи дека со формирање на такво тело би била намалена можноста за злоупотреба на одредени личности кои имаат негативен контекст низ различни историски епохи.
Министерството за правда на 15 овој месец најави состанок на работната група на кој ќе се дискутира за новиот закон за здруженија и фондации, откако изминатиот период во јавноста се отвори прашањето за издавањето дозволи за регистрирање здруженија со спорни имиња на историски личности.
Ова доаѓа откако во април годинава во Битола беше отворен културниот центар „Ванчо Михајлов“, а потоа беше регистрирано здружението „Цар Борис Трети“ во Охрид.