Тој, како што изјавија обвинителите, треба да се произнесе за имотноправното побарување на компанијата и за тоа дали „Државна лотарија“ се приклучува кон кривичноправниот прогон на обвинетите
На едно од следните рочишта, пак, како прв сведок ќе биде повикан Владо Петковски. Според податоците на профилите на Фејсбук и на Линкдин на лицето со ова име и презиме, станува збор за директор за продажба и развој на пазарот во „Државна лотарија“
Обвинителството на денешното рочиште ги изведе сите 231 материјален доказ во предметот „Државна лотарија“. Но, за анализата на нивната содржина и како секој од нив е поврзан со осумтемина обвинети, меѓу кои ексдиректорот на државната компанија, Перпарим Бајрами, и поранешниот прв вицепремиер Артан Груби, јавноста ќе добие целосна слика во понатамошниот тек на судскиот процес. Откако одбраната ќе заврши со своите забелешки на презентираните докази, процесот ќе продолжи со сослушување на сведоци.
Обвинителството на првото рочиште, пред еден месец, соопшти дека тие имаат предложено седум сведоци. Двајцата обвинители денеска не сакаа да откријат кои се тие, но одговарајќи на новинарско прашање, потврдија дека меѓу сведоците е и актуелниот директор на „Државна лотарија“, Александар Климовски. Тој, како што изјавија обвинителите, треба да се произнесе за имотноправното побарување на компанијата и за тоа дали „Државна лотарија“ се приклучува кон кривичноправниот прогон на обвинетите.
На едно од следните рочишта, пак, како прв сведок ќе биде повикан Владо Петковски. Според податоците на профилите на Фејсбук и на Линкдин на лицето со ова име и презиме, станува збор за директор за продажба и развој на пазарот во „Државна лотарија“.
Инаку, на расправата денеска обвинителите Александар Давчевски и Даниел Коцев накратко ги читаа доказите по број и даваа кратко образложение на кои околности се однесуваат.
Меѓу доказите што ги наведоа се статутот на компанијата од 2017 и 2019 година, тековната состојба на Лотарија, договорот од 2013 година меѓу „Државна лотарија“ и „Казинос Австрија“ за формирање друштво за организирање електронски игри на среќа, потоа реакцијата на австриската компанија до Владата дека само ова друштво може да приредува ваков тип игри на среќа. Дел од нив беа групирани во зависност од контекстот на околностите на кои се однесуваат – постапките за набавка на видеотерминалите, одлуките и заклучоците од седницата на Владата со која претседавел обвинетиот Артан Груби, записници од одлучувањето на Надзорниот одбор на компанијата, како и самата постапка за спроведување на јавната набавка, означена како голема зделка.
Обвинителот Давчевски не сакаше да открие повеќе за содржината на доказите, посочувајќи дека конкретна анализа на секој од нив ќе се прави во понатамошниот дел од постапката, конкретно во завршните зборови.
Тој наведе дека денеска биле изведени сите материјални докази на Обвинителството со исклучок на вештачењето и мислењето на вештото лице што го изготвило, кои, како што посочи согласно правилата се изведуваат откако пред судот ќе биде испитан вештакот во понатамошниот дел од постапката.
„За сите материјални докази коишто ги изведувавме денеска, некои поединечно, некои во групи, наведовме на кои околности се однесуваат и практично што произлегува од истите. Конкретна анализа на доказите, односно на секој доказ поединечно ќе се прави понатаму во постапката, конкретно во завршниот збор каде што и е местото на анализата. Во овој дел од постапката не би правеле анализа, ниту пред медиуми, ниту, пак, како што видовте и самите не е направена анализа и согласно напатствијата на судот за оваа фаза“,
рече Давчевски.
И покрај инсистирањето на новинарите, тој рече оти во оваа фаза, на некој начин би било и поткопување на стратегијата на Обвинителството да се изнесува содржината на секој доказ. Според него, тоа би било и непрофесионално од нивна страна.
„Значи доказите му беа презентирани на судот којшто секако е стручен и е надлежен за тоа да донесе одлука, да ги цени итн. Во однос на тоа дали е јасно или не е јасно, станува збор за специфична материја, се работи за специфични докази. Во понатамошниот дел од постапката, постепно дел по дел ќе се разјануваат работите, преку исказите на сведоците, дел преку исказите на вештаците кои се стручни лица и од стручен аспект ќе ги појаснуваат работите, така што на сите ќе им биде појасно. А секако, Јавното обвинителство во завршен збор ќе даде целосна анализа и стручна анализа на секој доказ од она што ќе произлезе во текот на постапката“,
кажа обвинителот Давчевски.
Краток осврт на денешното рочиште даде неговиот колега, обвинителот Даниел Коцев околу корелацијата на доказите со обвинителниот предлог.
„Со оглед на битието на кривичното дело што имс е става на товар на обвинетите, денеска беа изведувани докази во насока на нивната надлежност, односно докази со кои Обвинителството ќе се обиде да докаже дека тие ги пречекориле своите овластувања. Понатаму беа изведувани докази за нивното својство во моментот на сторување на делото, накратко кажано, и докази коишто се однесуваат на тоа на кој начин се носени одлуките на органите на управување на друштвото, на кој начин се набавени апаратите и на кој начин се платени“,
рече Коцев.
Во однос на сведоците, неговиот колега Давчевски, одговарајќи на новинарско прашање рече дека на нивната листа на сведоци не е поранешниот министер за финансии Фатмир Бесими, кој во времето кога биле преземени дејствијата за кои се товарат обвинетите беше министер за финансии.
Инаку, пред почетокот на изведувањето на доказите, бранителот на обвинетиот Бојан Јанев, адвокатот Јордан Апостолски, побара одложување на рочиштето бидејќи, како што кажа, поради кусите рокови им е потребно повеќе време да ги анализираат доказите на Обвинителството. Предлогот беше одбиен и од судијката, според која, од почетокот на судењето поминал повеќе од еден месец и одбраната имала доволно време да се запознае со доказите. Таа укажа и дека одбраната во текот на главната расправа ќе може да се запознае и да се произнесе по доказите и да ја изложи својата теорија во завршните зборови.
Апостолски во изјава за новинарите на пауза од рочиштето рече дека изведените докази што до тој момент ги слушнале во судницата само ја засилиле нивната теза дека обвинението е слабо, нејасно и контрадикторно.
„Од самите докази произлегува дека обвинетите не само што не ги сториле делата, туку постапувале по инструкции од Владата и го штителе државниот интерес како членови на Надзорниот одбор”,
рече адвокатот.
Тој додаде оти е нејасно зошто, како што кажа, Обвинителството го штити монополот што тогаш го имала „Казинос Австрија“, а не и правото на „Државна лотарија“ самостојно да приредува електронски игри на среќа. На новинарска забелешка дека според Обвинителството, тоа не го дозволува законот, Апостолски рече дека тие ќе докажат оти тоа не е точно.
„Според нашата теза и по законот во нашата теорија на случајот на случајот, ќе видите дека тоа не е така и дека ‘Државна лотарија’ можела и самостојно и со други друштва со ограничена одговрност да приредува игри на среќа”,
изјави Апостолски.
Ексдиректорот на Лотарија Перпарим Бајрами, поранешниот прв вицепремиер, Артан Груби,, поранешниот генерален секретар на Владата, Методија Димовски и поранепните членови на Надзорниот одбор на Лотарија – Скендер Мехмети, Бојан Јанев, Фатмир Рамадановски, Александар Димитриоски и Башким Авди, се товарат за злоупотреба на службената положба и овластување, во врска со противзаконска набавка на видеолотариски темринали за приредување електронски игри на среќа. Имено, според обвинението, обвинетите во текот на 2023 и 2024 година ги пречекориле границите на своите службени овластувања, иако знаеле дека АД „Државна лотарија“ нема право самостојно да приредува електронски игри на среќа на видеолотариски терминали. На едно од претходните рочишта Обвинителството направи допрецизирање на обвинителниот предлог, според кое наместо за штета од 507 623 173 денари или 8,2 милиони евра, обвинетите сега се товарат за штета од околу 9,7 милиони евра или 596 125 511 денари.