Струмичкиот бизнисмен Вице Заев, брат на лидерот на СДСМ и експремиер Зоран Заев кој се споменува во двата видео прилози на италијанскиот весник „Ла Верита“ во контекст на изборен криминал во 2014 година, ги негира обвинувањата и вели дека во времето на режимот на ВМРО-ДПМНЕ постојано бил прислушуван.
„Ова не’ потсети на методите и дејствувањето на ВМРО-ДПМНЕ и нивните медиуми од едно минато време на режимот, време на конструкции, монтажи, монтирани случаи во судството и обвинителството, јавен отстрел на семејства, неистомисленици, кога главна мета на најдолните измислици и монтировки беше токму Зоран Заев. Сите овие монтирани случаи и местенки, вклучително и за ова што сега очајно се повторува, издишаа како балон, затоа што за измислици не може ниту да има докази“,
изјави Заев за „Фокус“.
И тој како и претходно неговиот брат Зоран Заев вчера, кој исто така е обвинет за притисоци и уцени за гласови вели дека доколку имало докази, кривичната пријава што се споменува сигурно ќе била процесуирана. Тој за изборните кражби упатува на „бомбите“ каде се документирани вистинските сторители.
„Изборен грабеж, лажни лични карти, Пустец, кражба на изборен материјал, блокирани лифтови, црни вреќи, влечење за уши… се тоа е дел од изборните манипулации на ВМРО-ДПМНЕ. Оставам јавноста да цени дали ова што сега се прави е поради страв од нов изборен пораз на ВМРО-ДПМНЕ, дали е поради членството во НАТО и ЕУ, или можеби поради страв од донесување на новиот Закон за Јавното обвинителство, кој ВМРО-ДПМНЕ очајно не сака да се донесе“, вели братот на лидерот на СДСМ.
Италијанскиот весник „Ла Верита“ денеска на интернет-страницата продолжи со објавување делови од кривична пријава за која тврди дека била поднесена против Зоран Заев во 2014 година за купување гласови на изборите, а која останала до ден денес во фиока.
Во денешниот видео-прилог со наслов „Заев ги плаќал гласовите по 10 евра“ авторот Ларис Гајсер објавува транскрипти од разговори набавени наводно со ПИ мерки и во кои се споменуваат имињата на Заев како градоначалник на Струмица, неговиот брат Вице, Марјан Даскаловски, сопственик на менувачница „Даскал“, избран за пратеник во Собранието и претседател на локалниот огранок на СДСМ и на директорот на ЈП Комуналец-Струмица, Зоран Георгиев.
По вчерашниот и денешниот прилог, вчера обвинителката за гонење организиран криминал Вилма Русковска изјави дека тоа навистина се делови од истрагата на обвинителството во 2012/2015 година, но дека овој случај е затворен во 2018 поради немање докази.