Планираме да побараме уставни измени за да се промени делот во кој се вели дека службен јазик е и оној кој го зборуваат над 20 отсто, треба да се каже дека тоа е албанскиот јазик, вели лидерот на Алијанса за Албанците, Зијадин Села, во интервју за „360 степени“.
Тој вели дека тие како партија повторно ќе ја отворат темата за јазикот и додава дека ги разбира реакциите на Македонците кога некој им вели дека нивниот јазик треба да се нарече само како официјален јазик на една држава.
„Јас сум во една позиција во која мојот албански јазик, јазикот на мојата мајка, се дефинира со една дефиниција која е уште поскандалозна отколку тоа што го предлага Бугарија за Северна Македонија. Значи, јазик, кој е поинаков од македонскиот. Значи, албанскиот јазик е албански јазик, и секој јазик е поинаков од другиот“,
вели Села.
Тој додава дека во минатото се дискутирало за ваква промена, но тогаш оправдувањата биле дека не е отворен тој дел од Уставот за да се измени.
„Затоа што сите други народи тука во Македонија се нарекуваа привремени, само живеат, и кога му велиш на другиот само живееш, тоа значи дека не си имал минато, со идеја дека немаш ни иднина. Овој дел во преамбулата ние го отстранивме, и неколку други интервенции, како признавањето на Косово, итн. И тогаш имаше изјава од Заев, дека тоа е праведно, треба да се направи, но во друг момент кога ќе се отвори Уставот. На иста линија имаше изјава и од страна на претседателот на ВМРО-ДПМНЕ, Мицкоски, дека не треба да има дефиниции над, под 20 отсто. И сега е редно јас тоа да го тестирам, дали се тоа изјави за да се изгледа симпатично и привлечно од албанските гласачи или навистина го мислат тоа“,
рече Села.