По Османи денеска, во февруари се очекува во посета на Киев и на средба со Зеленски да отпатува и премиерот Димитар Ковачевски
Украинскиот претседател Володимир Зеленски упати благодарност во Владата и народот на Северна Македонија за поддршката за неговата земја откако денеска на средба со него и во посета на Украина беше шефот на дипломатијата, Бујар Османи, во улога на претседавач со ОБСЕ.
Зеленски на социјалните мрежи објави и видео од средбата со Османи со порака:
„Денес, поддршката од ОБСЕ е многу важна за Украина. За време на средбата со претседавачот со ОБСЕ, министерот за надворешни работи на Северна Македонија, Бујар Османи, разговаравме за потребата од се зголеми вниманието на ОБСЕ за кршењето на човековите права во привремено окупираните територии на Украина. Тоа е многу важно за нас. Благодарен сум на Владата и народот на Северна Македонија за хуманитарната и одбранбената поддршка кон Украина од самиот почеток на руската инвазија“.
По средбата од кабинетот на Османи, пак, порачаа дека министерот истакнал дека е импресивна пожртвуваноста и посветеноста на Зеленски во заштита на украинскиот народ. То оттаму повика Русија да стави крај на агресијата и ја истакна поддршката за украинската влада.
Тој и при презентирањето на приоритетите со претседавањето со ОБСЕ во Виена минатата недела порача дека Украина ќе биде приоритет број еден.
По Османи, во февруари се очекува во посета на Киев и на средба со Зеленски да отпатува и премиерот Димитар Ковачевски.