На прашањето дали истиот став го дели и вториот пратеник од ЛДП, Боби Мојсоски, таа одговори потврдно и посочи дека не може да гласаат за недоверба на Влада во која министер е партискиот лидер, Горан Милевски
Пратеничката Моника Зајкова од Либерално-демократската партија (ЛДП) за вечерашното издание на емисијата „360 степени“ изјави дека нема да гласа за недоверба на владата.
„Ние кажавме во една изјава дека слушнавме дека се собираат такви потписи, меѓутоа никој до нас немаше пристапено за ние да се потпишеме на таа иницијатива. Исто така, во неколку изјави кажавме дека и да дојде до нас таа иницијатива, нема да ја потпишеме и доколку биде поднесена во рамки на Собранието, ние нема да ја поддржиме“,
рече Зајкова.
На прашањето дали истиот став го дели и вториот пратеник од ЛДП, Боби Мојсоски, таа одговори потврдно и посочи дека не може да гласаат за недоверба на Влада во која министер е партискиот лидер, Горан Милевски.
„Апсолутно,затоа што ЛДП е партија која функционира врз основа на принципи, има своја организациска структура и која, нормално, е во постојана координација меѓу раководството и е единствена во ставовите. Ние не можеме да поддржиме нешто односно недоверба на Влада во која седи самиот претседател на партијата“,
изјави пратеничката.
Околу тоа како да се продолжи понатаму, таа вели дека треба да се има трпение и периодов треба да се биде воздржан од шпекулации или изјави затоа што е рано да се прејудицира што ќе се случува.
„Она што е сигурно е дека ЛДП секогаш делува врз основа на своите програмски определби и дека делува во согласност со интересот на граѓаните и државните интереси и не би преземала некои дејствија кои би ја загрозила европската перспектива или стратешките цели на државата“,
вели Зајкова.