На заедничка прес-конференција со новиот евроамбасадор во земјава Дејвид Гир, Заев рече дека средбата со бугарскиот премиер би се реализирала најдоцна до 10 ноември
Амбасадорот Гир, на прашање дали освен Бугарија и други земји имаат забелешки пред официјалниот старт на преговорите на ЕУ со Северна Македонија, рече дека не е во ситуација да зборува за внатрешните дискусии во Советот на Унијата
Премиерот Зоран Заев најави денеска дека планира средба со бугарскиот премиер Бојко Борисов пред самитот во Софија во рамки на Берлинскиот процес, чии домаќини се С Македонија и Бугарија.
На заедничка прес-конференција со новиот евроамбасадор во земјава Дејвид Гир, Заев рече дека средбата со Борисов би се реализирала до 10 ноември, со оглед на тоа што самитот, чии домаќини се двете земји, треба да се одржи на 10 и на 11 ноември.
„Не подоцна од 10 ноември би сакал да ја посетам Бугарија и да се сретнам со Борисов. Тоа ќе биде прва моја посета како претседател на новата влада. Имаме повеќе прашања за разговор“,
изјави Заев одговарајќи на новинарско прашање за односите со Бугарија, а во очекување на првата меѓувладина конференција со ЕУ, која треба да значи старт на преговорите со нашата земја.
Заев потсети на поддршката од Бугарија за добивањето на одлуката за почеток на преговорите и оцени дека е добро што продолжува со работа Мешовитата комисија за историски и образовни прашања.
За писмото што вчера го испрати до патријархот Вартоломеј, Заев, одговарајќи на новинарско прашање, рече дека тоа не е обид за дефокусирање од случувањата на релација со Бугарија, кои, како што нагласи, се во фокусот на македонските власти.
„Во координација со МПЦ, со која се консултиравме, проценивме дека е е добро по изборите да испратиме писма до Вартоломеј, со кого јас и Оливер Спасовски имавме средба во Истанбул во јануари годинава“,
рече Заев.
Запрашан дали според него Гоце Делчев е Македонец или Бугарин, Заев одговори дека тој е македонски револуционер, ама дека е факт дека и Бугарите го сметаат за бугарски револуционер.
„Ние имаме град Делчево, имаме споменици на Делчев во земјава. Но, заедно со Борисов се поклонивме пред споменикот на Делчев во Бугарија, како и пред неговиот гроб во Скопје. Историските личности треба да нѐ обединуваат и да бидат мотив за понатамошно градење заедништво“,
рече Заев.
Амбасадорот Гир, на прашање дали освен Бугарија има и други земји што имаат забелешки пред официјалниот старт на преговорите на ЕУ со Северна Македонија, рече дека не е во ситуација да зборува за внатрешните дискусии во Советот на Унијата.
„Во март беше донесена одлуката за почеток на преговорите, што е историски настан. Потоа беше подготвена нацрт-преговарачката рамка. Откако ќе биде дадена согласност за преговарачката рамка, треба да се одржи првата меѓувладина конференција. Германија, како претседавач со ЕУ, вели дека тоа ќе биде кон крајот на годината“,
изјави Гир, на заедничката прес-конференција со Заев.
Во фаза сме, рече новиот амбасадор на ЕУ во Скопје, кога признаваме дека Северна Македонија е пример за целиот регион.
„Треба да се реформираат сите области, особено владеењето на правото. Тоа поглавје треба да биде отворено прво, а затворено последно. Не помалку важни се и другите области – заштитата на граѓанските права, одржлива и динамична економија, заштита на животна средина. Напредокот во овие сфери ќе значи дека ЕУ ќе дојде во Северна Македонија“,
рече Гир.
Заев, пак, посочи дека за македонските власти е прифатлив принципот на реверзибилност на процесот, во случај на нарушување на демократските процеси во земјата. Сепак, како што рече, нема да дозволи тоа да се случи.
Премиерот, исто така, искажа поддршка за ставовите на европски претставници дека билатералните односи не смеат да бидат пречка во преговорите со ЕУ.