Лидерот на СДСМ, Зоран Заев, во интервју за „360 Степени“ зборуваше за економските мерки кои ги предложи за справување со кризата со коронавирусот и неговите проекции во однос на буџетот, дека од 30 до 40% ќе биде реализацијата на проектираните приходи на буџетот.
„Тоа е најлошото можно сценарио на основа на влезните информации коишто ги имам. Има реалистично, има и оптимистичко сценарио, но секогаш треба да се подготвите на најлошото сценарио“,
рече Заев.
Запрашан за драстичните предложени мерки за кратење на платите на минималец, Заев вели дека мора да постои солидарност.
„Не можете да очекувате тие што го полнат буџетот доминантно, тоа се работниците и фирмите, дека тие можат да го тераат и април и мај со 14.500, на минимум, на свои плеќи со трошоците, соопштувате и чекате сите нешто да направат, а вие ништо да не направите. Не, почнувате вие што ќе направите и ги повикувате сите да го направат истото. Тоа е пакетот на солидарност. Во едни такви околности, и тоа не е доволно. Ако недостатокот е некаде околу 2,2 милијарди евра, ние очекуваме дека ќе добиеме 600 милиони евра заем. До 2,2 милијарди имате уште 1,6 милијарди. Еден дел верувам дека ќе зголемиме во делот на кредитирањето. Ние немаме проблем, јас дадов инструкции политички, а секако владата и интитуциите носат свои одлуки, да земат 1 милијарда, 1,5 милијарди, 2 милијарди, колку можат, се зависи под кои услови е тоа. Големите пари ги зедоа прво големите држави и веќе не е така понудата голема на евтини пари“,
рече Заев.
Тој вели дека уште од почетокот на март се започнати постапките за задолжување во странство.