Возачот на „Дурмо турс“ делумно ја создал опасната ситуација кај Ласкарци минатата година во која при несреќата загинаа 16 лица. Со вака внимателно избрани зборови, вештакот Драган Аксентиев денеска при сведочењето елиминираше дел од причините што би можеле да влијаат врз концентрацијата на возачот во клучните 5 секунди кога тој ја изгубил контрола на автобусот.
Аксентиев вели дека возачот ниту заспал ниту зборувал на мобилен телефон, но не го свртел воланот навреме, а потоа било доцна да се исправи грешката. Тој наведе повеќе ситуации кои можеби за момент го деконцентрирале возачот, но вели дека не е негова стручност да оцени што точно е во прашање.
„Некое краткотрајно дејство на возачот кое за многу кратко време му го одзео вниманието… Некое друго краткотрајно дејство кое би го презел во тој момент возачот, било да е вртење со телото или главата, било да е наведнување, земање нешто или слично. Меѓутоа, како што реков, елиминиравме спиење за време на незгодата и употреба на мобилен телефон, и тоа аргументирано го елиминиравме“,
рече Драган Аксентиев – вештак од Бирото за судски вештачења.
На кобниот 13 февруари минатата година автобусот се движел на релација Скопје-Гостивар дење и по сув коловоз. Видливоста на патот, според вештачењата, била добра. Со тоа, се елиминирани други фактори што довеле до незгодата. Според вештиот наод, откако возачот сфатил што се случува, почнал да кочи, но механизмот за сопирање целосно се активирал кога веќе било доцна. Автобусот ја пробил заштитната ограда и се случила трагедијата.
За несреќата кај Ласкарци обвинети се шест лица. Сопственикот на „Дурмо турс“ – Дурмиш Белули, шефот на компанијата Ремзи Мифтари и возачот на автобусот Маноил Трифуновски се товарат за сторени тешки кривични дела против безбедноста и имотот во сообраќајот. Тројцата вработени во станицата за техничка контрола, пак, се товарат за соучесништво.