Шефицата на Основното јавно обвинителство за организиран криминал и корупција, Вилма Русковска, во интервју за „360 степени“ зборуваше и за случајот со Националната агенција за европски образовни програми и мобилност и за истрагата што е отворена за четири лица, вклучувајќи го и првиот човек на Агенцијата, директорката Лидија Димова.
Русковска рече дека во медиумите и јавноста повеќе бил интересот на доделувањето на средствата за проекти, но тие имаат и друго сомнение.
„Не станува збор само за доделување на средства за проекти, туку се работи и за сомнение и дека е прекршен и Законот за јавни набавки. Видете, секој има право да мисли дека не сторил кривично дело“,
рече Русковска.
Таа додаде дека брзината со која донеле наредба за спроведување на истражна постапка е и во тоа што надлежната обвинителка била веќе во тек со предметот, па затоа еден ден по кривичните пријави од страна на Финансиската полиција, ја донеле одлуката за истрага.