fbpx
Свет

(ВИДЕО) Руски воен блогер убиен со бомба во кафуле

360степени | 3 април, 2023 07:26

Во руските медиуми се појавија контрадикторни информации за експлозивната направа од која загина Татарски. Според изворите на руското МВР, цитирани од државните медиуми, непосредно пред експлозијата на Татарски му била подарена статуетка, а постои сомневање дека во неа била скриена бомба

Експлозија во кафуле во Санкт Петербург го уби познатиот руски воен блогер Владлен Татарски, потврди руското Министерство за внатрешни работи. Најмалку 25 лица се повредени, а 19 од нив се пренесени на лекување во болница.

На снимките објавени на социјалните мрежи се гледа експлозијата. Сè уште не е јасно кој е одговорен за активирањето на бомбата. Владимир Татарски (вистинско име Максим Фомин) беше истакнат пропагандист на руската државна политика и гласно ја поддржуваше руската војна во Украина.

Тој беше поканет како говорник на настанот што се одржа вчера во кафуле во Санкт Петербург, родниот град на рускиот претседател Владимир Путин.

Во руските медиуми се појавија контрадикторни информации за експлозивната направа од која загина Татарски. Според изворите на руското МВР, цитирани од државните медиуми, непосредно пред експлозијата на Татарски му била подарена статуетка, а постои сомневање дека во неа била скриена бомба.

За разлика од многу други руски воени блогери и новинари на режимскиот Кремљ во Украина, Татарски носел оружје во борбени операции, јавува дописничката на Би-би-си за Русија, Олга Ившина.

Тој зборуваше од фронтот во Украина, а „стана познат“ минатата година откако објави видео снимено во Кремљ, во кое вели: „Ќе ги победиме сите, ќе ги убиеме сите, ќе го ограбиме секој ако е потребно. Онака како што ни се допаѓа“.

Видеото е снимено на церемонијата во Кремљ, чиј домаќин беше рускиот претседател Владимир Путин, кој најави анексија на четири делумно окупирани региони на Украина, потег што наиде на меѓународна осуда.

Кафулето во кое беше убиен Татарски претходно беше во сопственост на основачот на злогласната руска платеничка група „Вагнер“, Евгениј Пригожин. Рускиот блогер на апликацијата Телеграм го следеле повеќе од половина милион луѓе. Иако ја поддржуваше руската инвазија на Украина, тој критикуваше некои аспекти од руската војна.

„Сајбер фронт З“, група која себеси се нарекува „Руска информативна армија“ на Телеграм, објави дека изнајмила кафуле во Санкт Петербург за вчерашниот настан.

„Се случи терористички напад. Презедовме одредени безбедносни мерки, но за жал тие не беа доволни“,

објавија по експлозијата.

Татарски им се приклучи на руските сепаратистички сили уште во 2014 година, кога зазедоа делови од регионите Донецк и Луганск во источна Украина. Роден е во Макиивка, Донецк. Според неговите зборови, тој им се придружил на бунтовниците во Донецк откако излегол од затвор каде што одлежувал казна за вооружен грабеж на банка.

©2024 360 степени, Сите права се задржани