Државата одби да му даде статус на стратешка инвестиција на претходниот проект, кој вклучуваше изградба на филмски и музички студија но само откако близу центарот на Скопје ќе се изгради комерцијално-станбен комплекс
Сега, „од игра“ е исфрлен барем еден од локалните партнери кој најавува и правна разврска. Кој и да е останат во холивидската приказна, властите тврдат дека одново се преговара со нив
На почетокот на летото во 2022 година, холивудската ѕвезда Џон Малковиќ ја возбуди македонската јавност со најавата дека, заедно со група инвеститори, сака да гради холивудски студија во земјава.
Копајќи малку подлабоко од промотивните видеа, набргу дојдовме и до планот. А според него, филмските студија требаше да се градат во некоја од слободните економски зони, но беа во втор план. Инвеститорите бараа прво да изградат т.н. „Скопје технолоџи парк“, комерцијално, деловен но и станбен комплекс кој би се градел на државна земја близу центарот на Скопје, на Качанички пат.
Во име на инвесторите зборуваше бизнисмен од регионот.
„Оваа група на луѓе е група која не прави мајмунлаци. Тие се занимаваат со бизнис“,
рече Видаковиќ есента 2022 г.
Групата потенцијални инвеститори бараше нивниот проект да добие статус на стратешки, што според домашното законодавство носи бројни поволности.
По неколкумесечниот статус кво, стана јасно дека проектот нема да добие статус „стратешки“ од оваа изјава на директорот на Дирекцијата за технолошко-индустриските развојни зони, Јован Деспотовски.
Проектот се состоеше од неколку елементи, филмскиот град беше само еден сегмент. Имаше еден крупен сегмент кој предвидуваше развој на комерцијални објекти, дел за домување и дел за деловни намени.
– Претпоставувам ако прават филмови треба да дојдат да спијат негде?
Не, не, не. Во рамки на самиот проект, некои рамки кажуваа дека нема зошто да се даваат одредени привилегии имајќи предвид дека таа дејност во државата е поприлично развиена.
рече Деспотовски во март 2023 година.
Со други зборови, власта препозна обид под плаштот на филмски студија, некој да изгради канцеларии, хотели и станови со државна помош. Но тоа, се чини, не го поколеба Џон Малковиќ и барем дел од луѓето околу него.
Актерот и режисер дојде на Охридско лето 2023 година. На прес-конференција по повод неговото гостување, новинарите го прашаа, но протоколот на манифестацијата не му дозволи да одговори на новинарско прашање за изградбата на „Филмскиот град“.
Но веќе наредниот ден, од една скопска винарија, тој побара поддршка за реализација на проектот, без притоа да објасни каде и што точно сакаат да градат.
„Цврсто верувам дека проектот на СТП е златна можност за сите Македонци. Овој напор не се состои само од изградба на филмски студија, туку претставува спој на уметност, креативност и економски раст. Ја претставува иднината и ќе донесе илјадници нови работни места и ќе служи како темел за нова и светла економска иднина за сите Македонци“,
рече Малкович минатата година.
Овој настап, на кој повторно не беа дозволени новинарски прашања, се чинеше дека е последниот чин во уште една од многуте бомбастични, но никогаш не остварени инвестиции во земјава. Но, при крајот на минатата 2023 година, Јован Деспотовски излезе со информација дека разговорите за Филмските студија се повторно отворени.
По празниците, тој најде време да ни ги објасни и деталите. Првичната компанија, вели Деспотовски, сакала да гради нешто што на државата во моментот не и е потребно. Но, подоцна, се појавила американска компанија чиј интерес бил исклучиво – градење на филмски студија. Таа идеја ТИРЗ сега сериозно ја разгледува.
„Како и за секој друг инвеститор, ги поканивме, имавме разговор со регионалните претставници во самата компанија, она што можам да го кажам е дека сериозни луѓе кои стојат зад тој проект, дали се истите поврзани со стратешкиот проект искрено и не знам меѓутоа како и за секој друг инвеститор ги поканивме и во моментот разговорите течат“,
рече Деспотовски.
Но што се случи со лицето на брендот СТП Капитал партнерс, Иван Видаковиќ, кој беше регионален претставник и најгласен во барањата за инвестицијата?
„Компанијата која ја застапува господинот што го споменавте аплицира за договор пред Владата во рамки на Закон за стратешки инвестиции каде што ние немаме како дирекција допирна точка. Правниот субјект кој сега ни пристапи и достави писмо е сосема друг правен субјект којшто повторно кажувам разговараме со регионалните преставници на компанијата за проект кој можеби е сличен за филмски студија, меѓутоа со многу поизострен фокус“,
кажа Деспотовски.
Дали СТП Капитал партнерс и нивниот „комерцијален“ проект на Качанички пат извисија и со кого точно преговара Македонија во моментов? Одговори побаравме лично од Иван Видаковиќ. Според него, додека тие нуделе готов проект, државата зад грб водела тајни преговори со други „актери“.
„Сега кога ги поврзувам работите, јас верувам дека по Џон Малковиќ се отвориле некои тајни разговори и преговори за овој делот со филмски и музички студија да се издвои. Бидејќи сега, очигледно пред избори, би можело тоа да биде жешка тема зошто не се дозволува на луѓето како Џон Малковиќ и Мет Дилон итн. и луѓето тоа се повеќе ги збунува. Така што, мислам дека на тој начин сакаа да ги издвојат филмските и музичките студија за да избегнат негативна кампања која би ја воделе и одредени глумци“,
вели Видаковиќ.
Преговорите за доставените проекти, вели Видаковиќ, оделе во позитивна насока со минатиот премиер Заев. По доаѓањето на Ковачевски на власт комуникацијата запрела. По двегодишниот молк од доставувањето на барањето за „стратешка инвестиција“, понудените проекти биле одбиени во ноември годинава без никакво образложение.
„Тие наместо тоа да го направат пред две години, тие сега пред избори бараат некој начин за да го „бајпасираат“ и да го извлечат проектот кој најверојатно најмногу ги боли ако биде медиумски негативно и прашање е што ќе понудат, јас лично не верувам во тоа, а ќе видиме што се случува во меѓувреме и правниците ќе одлучат како тоа ќе оди понатаму. Ама нема да оди така едноставно како што некои замислиле“,
рече Видаковиќ.
За него е спорно и зошто нивниот проект кој бил окарактеризиран како комерцијален бил одбиен, а статус на стратешка инвестиција, на пример, добил инвеститорот на Попова Шапка.
„Ако веќе зборувате дека нашиот проект е „Real estate project“ поради неколку згради и не земате ништо друго во предвид, а потоа кажете дека реновирањето на два хотела и две жичари и не знам колку куќи за одмор е стратешка инвестиција, тогаш се поставува прашањето кој овде греши“,
изјави Видаковиќ.
Српскиот инвеститор вели дека, сепак, тој не се откажува од првичната идеја за изградба на технолошкиот парк и покрај, како што вели, немањето слух на властите. Додава и дека ќе почекаат да го видат исходот од изборите во земјава, по што ќе одлучат како ќе постапуваат понатаму.
„360 степени“ се обиде да стапи во контакт и со Џон Малковиќ или некој од неговите американски партнери. Не успеавме, ниту со посредство на Деспотовски, кој тврди дека е во директна комуникација и преговори со актерот и тимот околу него.