Во моментов свештениците на чело со г.г. Стефан се подготвуваат за опход со литија по повод христијанскиот празник Велигден.
Храмот и неговата околина се празни, присутни се само свештениците и новинарските екипи, а околу објектот има полиција.
Верниците, засега, одлучија да го испочитуваат полицискиот час и да останат во своите домови.
Претходно, г.г. Стефан во велигденското обраќање им порача на верниците да истраат и да не се вознемируваат што не можат бројно да присуствуваат во храмовите, како и да се молат од своите домови. Кога не е на сила полицискиот час, верниците ги посетуваат храмовите, но дозволен е влез по најмногу петмина верници одеднаш, кои треба да се на одредено растојание.
Иако Владата не ги затвори црквите, поради полицискиот час храмовите и вечерва се празни. Техничкиот премиер Оливер Спасовски денеска ги повика и верските заедници во Македонија да ја преземат одговорноста за заштита на здравјето и животот на граѓаните.
