Од кабинетот на Пендаровски соопштија дека претседателот ја поздравил одлуката на Европскиот совет за отворање на преговори за членство на Украина во ЕУ
Северна Македонија од самиот почеток силно ја осудува агресијата на Руската Федерација врз Украина, која претставува повреда на Повелбата на ОН и принципите на ОБСЕ. Ова денеска го соопштил претседателот Стево Пендаровски на средбата со украинскиот претседател Володимир Зеленски, остварена во рамки на нивното заедничко учеството на самиот Украина – Југоисточна Европа кој се одржува во Тирана.
Од кабинетот на Пендаровски попладнево соопштија дека двајцата претседатели разговарале за последниот развој на случувањата во Украина и можностите за продлабочување на соработката во насока на поддршка на украинскиот народ и враќање на територијалниот интегритет на Украина во рамките на нејзините меѓународно признаени граници.
„Претседателот наведе дека нашата земја се приклучи на Кримската платформа, ја усвои Декларацијата за осуда на воените напади против територијалниот интегритет и суверенитет на Украина, се приклучи на Заедничката декларација на Г-7 за поддршка на Украина, на Меѓународната коалиција за враќање на украинските деца и го поддржа формирањето на Специјалниот трибунал, кој ќе ги истражува и гони сите злосторства на агресија извршени од страна на Руската Федерација“,
се вели во соопштението од неговиот кабинет.
Оттаму соопштија и дека претседателот ја поздравил одлуката на Европскиот совет за отворање на преговори за членство на Украина во ЕУ.
„Пендаровски истакна дека Северна Македонија, како земја членка на НАТО, останува посветена на политиката на отворени врати и ја поддржува апликацијата на Украина за членство во Алијансата“,
велат од претседателскиот кабинет.
Украинскиот претседател Зеленски, пак, на средбата изрази благодарност за цврстата позиција и севкупната поддршка којашто Украина ја добива од нашата земја.