Мијалков денеска доби 8 години затвор за злоупотреба на службената положба и овластување во предметот што се однесува на начинот на набавка на британска опрема за следење на комуникациите, а неговата одбрана е убедена дека пресудата ќе „падне“ пред Апелација
Одбраната на ексдиректорот на УБК, Сашо Мијалков, е убедена дека денешната пресуда од Основниот кривичен суд за предметот „Трезор“, со која тој доби 8 години затвор, ќе падне пред повисокиот Апелациски суд. Првостепената пресуда ја нарекоа поразителна и разочарувачка.
„Навистина разочарувачки ден за правдата и правото затоа што судот во образложението на пресудата изнесе неколку невистини, односно изврши замена на тези во поглед на она што е предмет на обвинението“,
рече адвокатот Љупчо Шврговски.
Тој и денеска излезе со став дека во предметот каде што неговиот клиент се гони за злоупотреба на службената положба и овластувања не може да постои ова дело истото мора да е поврзано со прекршување на други закони, што не е случај во „Трезор“.
„Кога судот реферираше дека Сашо Мијалков ја злоупотребил својата службена положба не најде за сходно да нè удостои со одговор кои одредби и од кој закон, Мијалков ги има повредено. Ова кривично дело, оние што го познаваат кривичното право добро знаат, е од општо карактер, што значи дека доколку во обвинението не е инкорпорирана повреда која се наоѓа во друг закон или подзаконски акт, само по себе како кривично дело не може да опстои“,
вели адвокатот.
Според одбраната, не се докажало ниту дека Мијалков одел во Лондон за да договара набавка на опрема за следење на комуникации од британска компанија. Шврговски вели дека не еднаш туку трипати ексдиректорот на УБК бил во Лондон, но смета дека од доказите на обвинителството не се докажано оти имал средба со британската компанија „Гама интернешнл“ и дека договарал набавка.
Шврговски ја обвини одбраната и дека направила замена на тези во исказот на поранешниот помошник-министер за јавни набавки во МВР, Ѓоко Поповски.
„Судот, образложувајќи ја пресудата, рече дека сведокот Поповски од менаџментот на УБК добивал усни напатствија кога требало да бидат вршени набавки за потребите на Управата. Меѓутоа, на конкретно прашање дали за овој настан (британската опрема) него му било сугерирано преку фирмата ’Финзи‘ да се врши набавката, тој децидно кажа дека таква препорака не добил. Тоа значи дека судот го зема исказот на Ѓоко Поповски, кој е општ и се однесува на целокупните набавки, а не тој што се однесува на конкретната набавка“,
изјави адвокатот.
Како последен аргумент на одбраната зошто е незадоволна од пресудата е што нема вештачење од експерт по економски науки туку судот и обвинителството сами ја пресметале штетата што треба да се надомести.
Обвинителите Трајче Пеливанов и Артан Ајро, пак, по изрекувањето на пресудата пред медиумите не даваа изјави за тоа дали се задоволни од изречените казни.
Случајот за набавката на британска опрема за следење на комуникациите, меѓу кои и е-пошта, пораки на „Вибер“, „Ватсап“ итн., го отвори СЈО, а потоа премина во рацете на редовните обвинителства. Според обвинението за „Трезор“, а сега и според првостепената пресуда, обвинетите поранешни функционери од УБК наместо да ја набават опремата директно од британската „Гама Интернешнл“ како најекономичен начин, тоа го направиле преку фирма-посредник. Станува збор за фирмата „Финзи“ која, потенцираа обвинителите, била основана од офшор-фирма во САД, а на која како краен сопственик се јавува бизнисменот Орце Камчев. Прв управител на скопската фирма бил регистриран братот на обвинетиот помошник-министер во МВР, Небојша Стајковиќ, а потоа управител бил починатиот Коста Крпач. Оваа фирма, поради сомнителниот капитал и потекло, е дел и од истрагата „Империја“ каде што се осомничени и Сашо Мијалков и Орце Камчев.