Погледнете го новото издание на емисијата „360 степени”, емитувано на 24 март 2025 г. на МРТ 1, во кое објавуваме одделни разговори со адвокатката Сузана Јошевска-Анастасовска, заменик-министерот за економија и труд Марјан Ристески и директорката на Клиниката за пластична и реконструктивна хирургија Јасмина Ѓоргиевска Павловска
Новото издание на емисијата „360 степени“ е поделено на три дела. Првиот сегмент е фокусиран на истрагата за трагедијата во Кочани и прашањата што се отворија – зошто обвинителството се реши за мегапредмет, зошто сите 27-мина се осомничени за исто кривично дело, како се прави врска на „верижни пропусти“, зошто веригата е прекината кај сегашните директори на ДПИ и ДЗС. На оваа тема разговараме со адвокатката Сузана Јошевска-Анастасовска. Во вториот сегмент, заменик-министерот за економија и труд Марјан Ристески го прашуваме дали имале индиции дека нешто не е во ред со издавањето лиценци за дискотеки, ноќни клубови и кабареа, кој е вработениот службеник осомничен за примање мито за фалсификувана лиценца, кои се слабите места во Законот за угостителската дејност и какви ќе бидат измените што се најавуваат. Во третиот дел од емисијата, со директорката на Клиниката за пластична и реконструктивна хирургија, Јасмина Ѓоргиевска-Павловска, разговараме за комплексноста на лекувањето на повредените, прифаќањето на згрижените во странство по нивното враќање во земјава, а ја прашуваме и дали на Македонија ѝ треба специјализиран центар за изгореници.