fbpx
Свет

(ВИДЕО) Најмалку петмина загинати и стотици повредени во торнадо во САД

360степени | 29 април, 2024 09:14

Четири од смртните случаи се во Оклахома, а петтото лице е починато во Ајова

Најмалку пет лица, вклучително и едно четиримесечно бебе, загинаа откако десетици торнада го зафатија централниот дел на САД предизвикувајќи сериозни штети.

Четири од смртните случаи се во Оклахома, а петтото лице е починато во Ајова од повреди кои ги добило откако бура го погоди Средниот Запад, пренесуваат локалните медиуми.

Од вчера илјадници луѓе се без електрична енергија, а гувернерот на американската сојузна држава Оклахома, Кевин Стит, поради последиците од невремето, издаде наредба со која прогласи вонредна состојба во 12 окрузи.  

Градот Сулфур во источна Оклахома, во кој има околу 5 000 жители, е меѓу најпогодените. Од снимките кои може да се видат на социјалните мрежи се гледа дека во градот има срамнети куќи и превртени автомобили.

Според Одделот за управување со вонредни состојби во Оклахома, болниците ширум државата пријавиле околу 100 повредени.

„Едноставно не можете да поверувате колкав е обемот на уништувањето. Се чини дека секоја фабрика во центарот на градот е уништена“,

рече Стит при посетата на градот Сулфур.

Во разговор со гувернерот Стит, американскиот претседател Џо Бајден понуди целосна поддршка од федералната влада со цел да се помогне во спасувачките напори и обновата на погодените региони, се вели во соопштението на Белата куќа.

Националната метеоролошка служба издаде предупредување за силен ветер, дожд и град за повеќе од 47 милиони луѓе од источен Тексас до Илиноис и Висконсин.

Според Националната метеоролошка служба, 38 торнада имало во областа и дека најлошото невреме ја опустошило централна Оклахома, а се раширило и во северозападниот дел на Тексас, западниот дел на Мисури и Канзас.

Агенцијата предупреди дека обемот на уништувањето сè уште се проценува, поради нередот кој го има со соборени дрвја и далноводи и патишта полни со отпад.

Торнадото целосно уништи и голем центар за испорака во градот Мариета, Оклахома.

©2024 360 степени, Сите права се задржани