Лидерот на ВМРО-ДПМНЕ на прес-конференцијата рече дека ова требало да личи на меѓуетнички конфликт, а всушност, како што рече, не е ништо повеќе од борба за власт, фотелји и функции на партиите кои се дел од Владата
Лидерот на ВМРО-ДПМНЕ Христијан Мицкоски вечерва одржа прес-конференција во седиштето на партијата, најавена како вонредна, по повод, како што рече тежок инцидент за време на протестите кај плоштадот Скендер Бег, кои според него, бил со цел убиство на некој недолжен граѓанин, мајка со дете, пензионер, млад човек или негово убиство.
Мицкоски обвини дека се работи за „класична полициска монтажа по сите параметри“, која требало да личи на меѓуетнички конфликт, а всушност, како што рече, не е ништо повеќе од борба за власт, фотелји и функции на партиите кои се дел од Владата.
„Ова нема врска со меѓуетничка нетрпеливост, туку единствено повторува борба за гола власт. Меѓу другото, подолго време добивам неформални информации кои говорат за моја елиминација која ја нарачува власта. Не придавав значење. Вечерва видовме најмалку две лица со огнено оружје кои беа подготвени тоа да го направат. Тие дури направија и повеќе истрели кои се само за чиста среќа не завршија во илјадниот народ кој излезе мирно да протестира против оваа власт. Сакам да потсетам дека ваквото сценарио го најави власта, министерот за надворешни работи Бујар Османи. Најави дека ќе има меѓуетнички тензии, Ако не поминел предлогот кој опфаќа асимилација и бугаризација на Македонија. Ковачевски и Спасовски во континуитет градат милитантен контекст на создавање тензии и поделба. Најава за молотови коктели, жртви и слично. И тоа откако не им успеа, а тоа беше сценариото за уфрлање на полициски инфилтрати, кои ќе предизвикаат инциденти, а за кои подоцна ќе биде обвинет мирниот и достоинствен народ. Вечерва го достигнаа врвот во својата монструозност, каде требаше да се загуби човечки живот, еден или повеќе за да тие останат на власт и што е пострашно да продолжат да крадат“,
рече Мицкоски и обвини дека полицијата ја немало на потребното место и мистериозно се појавила помала група од 10-ина луѓе вооружени со огнено оружје.
Тој ја посочи фотографијата од настанот која претходно ја објави и на Фејсбук и рече дека на неа се гледа пиштол и „народот кој не му се плаши“.
„Тоа е пораката од власта. Тој беше насочен за губење на нечиј невин човечки живот. На овие слики кои ги гледаме не е најважна етничката припадност. Туку гледаме криминалци, хушкачи на власта кои заедно со власта одат против народот. И немојте да се обидувате да кажувате дека луѓето се припадници на една или друга политичка опција. Тие имаат една страна, а тоа е страната на криминалот и тоа дека имаат тесни врски со власта за која одработуваат“
изјави Мицкоски.
Одговарајќи на новинарско прашање да ја коментира информацијата дека лицето кое е на фотографијата што тој ја сподели е брат на директорот на „Комунална хигиена“ од Алијанса на Албанците, Мицкоски рече дека во вакви моненти не треба да се политизира ситуацијата.
„Не ме интересира чиј член е туку тој што направил криминал треба да одговара. И родена сестра да ми е ако сторила криминал има да одговара. Овој човек стори криминал впери пиштол кон народ и треба да одговара“,
рече Мицкоски.
Во однос на тоа какви закани добивал досега и дали ги пријавил, Мицкоски рече дека се што добивал како закана до пред една година ги пријавувал онаму каде што треба, но посочи дека од тоа немало никаква реакција. Поради тоа, како што рече, последниве месеци не пријавувал бидејќи немал повратно од тоа досега што пријавувал. Тој исто така посочи дека е можеби единствен лидер на голема партија кој нема обезбедување од МВР и како што рече нема ниту да бара, ниту пак да прифати ако му понудат.