Ако успеат да ги натераат Бугарите да го променат нивниот Устав и ако успеат Македонците кои се таму во огромен број да бидат признаени како национално малцинство, јас ќе бидам првиот кој ќе се зачлени во ВМРО-ДПМНЕ. И станува збор за детски муабет, кажа Пендаровски на Конгресот на СДСМ вечерва, откако ја доби нивната поддршка во кандидатурата за втор претседателски мандат
Откако СДСМ вечерва ја официјализира поддршката за Стево Пендаровски за неговата кандидатура за втор претседателски мандат, тој во своето обраќање на партискиот Конгрес порача дека очекува двојна победа.
„Мојата проценка е дека не само на претседателските, туку и на парламентарните избори, СДСМ и коалицијата, ќе ја направат коалицијата која ќе ја води Македонија во следните 4 години. Значи, јас очекувам двојна победа, затоа што македонските граѓани знаат дека алтернативата на ова што го нудиме, со сите грешки што ги признаваме и за кои јавно сме се извинувале и ќе се извинуваме, е заробена држава, е малтретирање на администрацијата на оние кои не се нивни, криминал од енормни размери и тотална изолација на државата од евроатлантските интеграции“,
кажа Пендаровски.
Во говорот, меѓу другото, тој посочи и дека со алтернативата, Македонија ќе биде на маргините на Европа, со перспективи никогаш да не стане дел од Европската Унија.
„Нивната теза е, прво ќе дојдеме на власт, ќе се обидеме економски да ја кренеме Македонија на здрави нозе и на странските амбасадори им велат, во втората половина од нашиот мандат ќе се обидеме со Бугарите да се договориме. На кој начин – на начин што ќе ги натераме Бугарите да го променат нивниот Устав, за да можат да бидат признаени нашите Македонци кои таму живеат. Јас од овде им велам, ако успеат да ги стават Македонците во Уставот на Бугарија, да ги натераат Бугарите да го променат нивниот Устав и ако успеат Македонците кои се таму во огромен број, да бидат признаени како национално малцинство, јас ќе бидам првиот кој ќе се зачлени во ВМРО-ДПМНЕ. И станува збор за детски муабет“,
рече Пендаровски.
Оцени и дека анкетите што ги прикажува ВМРО-ДПМНЕ се лажни и трендовите од пред извесно време се променети.
Актуелниот шеф на државата и претендент за втор мандат попладнево соопшти дека за неполни пет часа ги собрал потребните граѓански потписи за негова повторна претседателска кандидатура.
За кратко време денеска потребниот број потписи го собрала и кандидатката на ВМРО-ДПМНЕ, Гордана Силјановска-Давкова.
Граѓанска поддршка за претседателската трка обезбедија и Билјана Ванковска од Левица, Стевчо Јакимовски од ГРОМ, Бујар Османи како кандидат на ДУИ, Арбен Таравари од коалицијата „Вреди“, како и Максим Димитриевски од ЗНАМ, со што веќе се наѕираат контурите на избирачкото ливче за претседателските избори.