fbpx
Свет

(ВИДЕО) Инциденти на повеќе локации во Белград по завршувањето на студентскиот и граѓански протест

360степени | 23 мај, 2026 22:53

Неколку млади луѓе биле соборени на земја откако фрлале шишиња со вода кон Жандармеријата, кога таа ја почнала својата интервенција. Насобраните фрлиле и факели кон оваа полициска единица

Министерот за внатрешни работи Ивица Дачиќ изјави дека 23 лица биле приведени поради напади врз полицајци, а дека меѓу службениците имало и повредени

Неколку инциденти се случиле вечерва на различни локации во центарот на Белград, по завршувањето на големиот студентски и граѓански протест под мотото „ Ти и јас, Славија, затоа што студентите победуваат“, на кој беше повторено барањето на неформалната група „Студенти во блокада“ за вонредни избори.

Како што извести телевизијата Н1, околу 20 часот, кога протестот бил завршен и луѓето си оделе, една група застанала на аголот кај Пионерскиот парк и Народното собрание и почнала, според првичните информации, да фрла експлозивни направи внатре во паркот. Експлозии се слушнале и на спротивната страна од паркот.

Пионерскиот парк се наоѓа на нешто помалку од еден километар од плоштадот „Славија“, каде што се одржа протестот. Тој е познат како собиралиште на поддржувачите на власта и на претседателот Александар Вучиќ.

Веднаш интервенирала српската Жандармерија, која во текот на денот не била присутна на протестите, а полициското присуство на улиците значително се зголемило. Дел медиуми пренесуваат реакции од граѓани дека никогаш порано не виделе толку полиција.

Неколку млади луѓе биле соборени на земја откако фрлале шишиња со вода кон Жандармеријата, кога таа ја почнала својата интервенција. Насобраните фрлиле и факели кон оваа полициска единица.

Полициски кордон бил поставен и на улицата Крал Милан, а дошло до судир меѓу полицајците и демонстрантите на аголот меѓу таа улица и Кнез Милош. Репортерот на Н1 јавил дека еден повозрасен граѓанин застанал меѓу двете групи и барал од демонстрантите да не фрлаат предмети кон полицијата. Телевизијата објави и дека повеќето луѓе се обиделе мирно да го напуштат плоштадот „Славија“ по протестот, но една група ги почнала немирите, фрлајќи пластични и стаклени чаши кон полицајците. На повеќе локации се слушале топовски удари и петарди. Дел од демонстрантите што биле вклучени во немирите носеле маски.

Кај Ташмајданскиот парк биле запалени контејнери, а кај булеварот Крал Александар полицијата потиснала група демонстранти што се движела кон Уставниот суд. Друг репортер на телевизијата Н1 јавил дека од споредна улица наишла група луѓе што почнала да ја гаѓа полицијата со предмети, која, пак, веќе добила наредба да тргне кон „Славија“. Помал дел жандарми останале на местото, а еден демонстрант бил уапсен.

Жандармеријата стигнала до плоштадот „Славија“, каде што биле останати само мал број граѓани, и почнала да го расчистува просторот. Н1 известува како граѓаните стоеле со кренати раце и им објаснувале на полицајците дека се тука само за да ја размонтираат бината.

Хрватскиот портал „Индекс“ пренесе дека според изјава на српската претседателка на парламентот Ана Брнабиќ, биле уапсени 20 лица. „Индекс“ исто така пренесува реакции од српски корисници на социјалните мрежи, кои изразиле сомнеж дека на протестот биле уфрлени провокатори.

Вишото јавно обвинителство во Белград објави дека сите што ги нападнале полицајците, што го обезбедувале вечерашниот собир, ќе бидат идентификувани и гонети согласно законот.

Обвинителството остро ги осуди ваквите напади и предупреди дека нападите врз припадници на полицијата претставуваат кривично дело.

Министерот за внатрешни работи Ивица Дачиќ изјави дека 23 лица биле приведени поради напади врз полицајци, а дека меѓу службениците имало и повредени.

Тој ги осуди нападите врз полицајците, наведувајќи дека полицијата си ја вршела својата работа и дека биле нападнати со сите средства – пиротехнички средства, камења, шишиња, дури и капаци за шахти.

„Која беше целта на овие екстремисти? Напад врз полицијата и напад врз политичките дисиденти лоцирани во паркот Пионирски. Значи, полицијата беше нападната, тие не нападнаа никого. Сите оние што ја нападнаа полицијата, секако, процесот на идентификација е во тек и тие ќе бидат санкционирани според законот“,

рече тој.

©2026 360 степени, Сите права се задржани