Поранешниот министер за земјоделство сними спот за промоција на новите владини мерки, од третиот пакет, за поддршка на земјоделието
Во спот за промоција на третиот пакет економски мерки на Владата се појавува генералниот секретар на СДСМ Љупчо Николовски.
Николовски, кој е поранешен министер за земјоделство, а сега не е на функција во Владата, ама е носител на листа на СДСМ во третата ИЕ, во спотот посебно се осврнува на мерките што се однесуваат на земјоделството. Како што наведува Николовски на фејсбук, третиот пакет на економски мерки усвоен од страна на Владата предводена од СДСМ дава голема поддршка на македонското земјоделство.
Главен противкандидат на Николовски на 10.парламентарни избори, чиј термин за старт на кампањата и за гласање е се уште неизвесен, е генералниот секретар на ВМРО-ДПМНЕ Игор Јанушев.
Од носители на листите на коалицијата на СДСМ, кои беа утврдени на 11 март, тројца се членови во техничката влада. Покрај премиерот Оливер Спасовски (во втората ИЕ), и министрите за надворешни работи и за одбрана Никола Димитров и Радмила Шекеринска се носители на листи во првата и во петтата ИЕ. Од друга страна, освен Николовски, државна функција моментно не извршува ниту лидерот на СДСМ Зоран Заев, кој е повторно носител на листата во четвртата ИЕ, како и лидерот на Беса Билал Касами, кој е носител на коалициската листа во „шестката“.