Пожарот на планината Серта во делот над селата Драгоево и Селце на територија на Општина Штип е еден од најсериозните што ниту вчерашниот дожд не успеал да го изгасне
Во 26 налета полицискиот хеликоптер „бел-412“ денеска исфрлил 39 тони вода врз пожарот на планината Серта.
Од Министерството за внатрешни работи (МВР) велат дека полицискиот хеликоптер дејствувал на пожарот меѓу штипските села Драгоево и Селце.
Оттаму додаваат дека пожарот е сѐ уште активен и се продолжува со активности за негово гаснење.
Пожарот на планината Серта во делот над селата Драгоево и Селце на територија на Општина Штип, како што информира директорот на Центарот за управување со кризи (ЦУК), Стојанче Ангелов, е еден од најсериозните што ниту вчерашниот дожд не успеал да го изгасне.
Ангелов вели дека денеска, до 14 часот, активни се вкупно осум пожари на отворено низ цела Македонија.
Ангелов информира дека денеска се ангажирани 145 припадници на Армијата распоредени на различни места на кои беснеат пожарите. Ангажирани се и 55 припадници на полицијата. Со нив дејствуваат и 40 припадници на Дирекцијата за заштита и спасување (ДЗС).