Кенијците протестираат против зголемувањето на даноците, а многумина бараат оставка од претседателот Вилијам Руто
Активистката од Кенија, Аума Обама, полусестра на поранешниот американски претседател Барак Обама, беше меѓу демонстрантите врз кои полицијата употреби солзавец пред зградата на парламентот во Најроби, објави Си-ен-ен.
Полицијата отвори оган врз демонстрантите кои се обидоа да упаднат во зградата на парламентот.
Најмалку пет демонстранти загинаа, десетици беа повредени, а делови од зградата на парламентот беа запалени додека пратениците го усвојуваа законот за зголемување на даноците. Законот треба уште да го одобри претседателот.
.@LarryMadowo is live on scene as protests over a controversial financial bill escalate in the Kenyan capital of Nairobi.
— CNN International PR (@cnnipr) June 25, 2024
He’s been speaking to protesters on the ground, including Auma Obama – Barack Obama’s sister: pic.twitter.com/12TOW2iR7e
На видеото се гледа како новинарот на Си-ен-ен ја повлекува Аума Обама и ја прашува зошто е таму.
„Тука сум затоа што погледнете што се случува. Младите Кенијци протестираат за своите права. Тие протестираат со знамиња и транспаренти. Не можат веќе ниту да гледаат. Ни фрлија солзавец“,
вели таа кашлајќи од чадот.
Демонстрант зад неа носи транспарент на кој пишува: „Колонијализмот во Кенија никогаш не заврши“, а друг извикува: „Ова е нашата земја. Ова е нашата нација“.
Аума Обама објави фотографии на Твитер на кои се гледа како учествува на протестите.
— Auma Obama (@AumaObama) June 25, 2024
Кенијците протестираат против зголемувањето на даноците, а многумина бараат оставка од претседателот Вилијам Руто.
Руто победи на изборите пред речиси две години промовирајќи се себеси како претставник на сиромашните работници, но се најде заглавен меѓу конкурентните барања на заемодавците, како што е Меѓународниот монетарен фонд, кој бара од владата да го намали дефицитот за да добие пристап до повеќе средства, и барањата на граѓаните.
Кенијците се борат со економската криза предизвикана од пандемијата на ковид-19, војната во Украина, две последователни години суша и девалвација на националната валута.
Со новиот закон се бара да се соберат дополнителни 2,7 милијарди долари даноци со цел да се намали долгот, со оглед на тоа што само плаќањата на каматите сочинуваат 37 отсто од годишниот приход на земјата.
Владата веќе направи одредени отстапки, ветувајќи дека ќе се откаже од новите даноци за леб, масло за јадење, автомобили и финансиски трансакции. Но, тоа не беше доволно за да ги задоволи демонстрантите.
Во масовните протести низ целата земја минатата недела беа повредени најмалку 200 лица, едно лице загина, а повеќе од 100 беа уапсени.