Соединетите Американски Држави (САД) се надеваат дека по оставката на Зоран Заев, идната Влада ќе може да ја задржи силната евроатлантска посветеност и со тоа поддршката од Вашингтон, вели Габриел Ескобар, заменик-помошник државен секретар на САД, во интервју за емисијата „360 степени“ емитувано вечерва на ТВ Алсат.
Прашан дали има коментар на „неодамнешните и тековните внатрешно-политички случувања во Северна Македонија – најавената оставка на Зоран Заев од премиерската позиција, обидите за уривање на актуелната влада, преговорите за консолидирање на парламентарното мнозинство“, Ескобар одговори:
„Нашето партнерство со Северна Македонија е со нејзините граѓани и институции. Затоа, се надеваме дека идната влада, исто како и оваа, ќе може да ја задржи силната про-НАТО посветеност и силниот евроатлантски фокус. Се надеваме дека која било Влада ќе има таква посветеност и, се додека е така, ќе ја има нашата поддршка.“