fbpx
Свет

(ВИДЕО) Двајца пилоти се загинати откако грчки воен авион се урна за време на авијациска манифестација

360степени | 5 септември, 2026 22:41

Прелиминарните извештаи велат дека пилотите не го активирале системот за катапултирање на авионот и можеби се обиделе да го насочат подалеку од гледачите и населените места

Двајца пилоти на грчките воздухопловни сили загинаа кога воен авион „F-4E Phantom II“ се урна за време на авијациската манифестација „Недела на летање во Атина“, пишуваат грчките медиуми.

Несреќата се случила во 14:55 часот, југоисточно од воената воздухопловна база во Танагра. Авионот, управуван од 338-та ескадрила на воздухопловните сили, изгубил висина и се урнал во обработливо земјиште пред гледачите. Дел од авионот удрил во близок индустриски објект, предизвикувајќи пожар што се проширил во околните рурални и шумски области, пишува грчкиот весник „Катимерини“.

Членовите на екипажот, идентификувани од воздухопловните сили како водач на ескадрила и капетан, биле пронајдени во несвест, а подоцна било потврдено дека се починати. Имиња биле објавени од воздухопловните сили користејќи ги нивните иницијали.

Прелиминарните извештаи велат дека пилотите не го активирале системот за катапултирање на авионот и можеби се обиделе да го насочатподалеку од гледачите и населените места. Според извештаите, била достапна снимена размена помеѓу пилотите и контролата на земја во минутите пред несреќата. Но, според пишувањата на весникот, извештаите не биле независно потврдени.

По несреќата следувала брза реакција за гаснење пожари, а имало и ограничувања на сообраќајот во областа. Во гаснењето на пожарот биле ангажирани 115 пожарникари со пет пешадиски тима и 38 возила, а за гаснење од воздух периодично интервенирале девет авиони и четири хеликоптери, од кои еден за координација.

Министерот за одбрана Никос Дендиас прогласил тридневна жалост за вооружените сили, а воздухопловните сили назначиле комисија за истрага на причината за несреќата.

©2026 360 степени, Сите права се задржани