Акцијата, како што информираат од МВР, се спроведува во врска со сомненијата за загадување на водата во гостиварскиот водовод
Во полициска акција денеска е уапсена в.д. директорката на Јавното претпријатие „Комуналец“-Гостивар, Артана Асани, потврдија попладнево од Министерството за внатрешни работи (МВР). Покрај неа, во акцијата, која се спроведува врска со сомненијата за загадување на водата во гостиварскиот водовод, приведени се и шефот на гостиварски „Водовод и канализација“ и техничкиот директор на ЈП „Комуналец“-Гостивар.
„Полициски службеници од ПС Гостивар во координација со Основното јавно обвинителство Гостивар лишија од слобода три лица во врска со сомненијата за загадување на водата во гостиварскиот водовод. Лишени од слобода се А.А. од с. Здуње – в.д. директор на ЈП „Комуналец“-Гостивар, В.Д. од с. Форино шеф на ‘Водовод и канализација’ и Л.Н. од с. Вруток – технички директор на ЈП ‘Комуналец’-Гостивар“,
информираат од МВР.
Оттаму додаваат дека надлежните институции продолжуваат да преземаат дејствија и да прибираат докази во рамки на предистражната постапка за случајот.
Од МВР објавија и видеоснимка од апсењето на Асани и нејзините соработници од претпријатието.
Акцијата доаѓа откако СВР Тетово во петокот објави дека Јавното претпријатие „Водовод“ во соработка со Општина Гостивар поставило три пумпи во корито на истечни отпадни води, преку кои се внесувала вода директно во главниот цевковод што го напојува градот со вода за пиење.
Директорката на ЈП „Комуналец“-Гостивар, Артана Асани, тогаш ги отфрли наводите на МВР за причините за епидемијата која ги погоди гостиварци велејќи дека пумпите биле поставени само за кратка симулација на 25 јуни, работеле неколку часа, а водата потоа била испуштена во Вардар и не влегла во системот за водоснабдување.
- Директорката на гостиварски „Комуналец“ контра МВР – спорните пумпи работеле кратко и тоа на 25 јуни
Градоначалникот на Општина Гостивар, Валбон Лимани, денеска објави дека директорката на гостиварски „Комуналец“ и дел од раководството на претпријатието се суспендирани од работа.