Излезеноста на првиот круг од претседателските избори во Центар Жупа беше 16,9%. Мештаните велат – среќа што во општината имало иселеници на одмор па го подигнале одзивот
Центар Жупа имаше најниска излезеност од сите општини во државата на изборите на 24 април. На избирачкото место со најнизок одзив излегле само 12,73% од запишаните избирачи
Изградените големи куќи ретко имаат фасади. Тоа е еден од показателите дека во најголем дел од годината тие се празни, оти во нив „живеат“ печалбарите кои само повремено се враќаат дома.
Токму поради фактот што Центар Жупа е печалбарско место, не е новост тоа што на неодамнешните избори општината имаше ниска излезеност.
„Овде населението е сето иселено, зашто нема со што да се занимава“
Но, не престанува да изненадува колку е мал тој процент на население кое го остварува своето уставно право.
„На првиот круг од претседателските избори Општината Центар Жупа имаше најмала излезеност на ниво на цела Македонија или во проценти само 16,90% од регистрираните гласачи го искористиле правото на глас. Оваа бројка е сама по себе алармантна, но она што дополнително загрижува е што овдешното население стравува дека за изборите на 8 мај овој процент ќе се намали бидејќи голем дел од иселениците кои биле тука на 24 април веќе започнале да се враќаат назад во европските земји“
ЦЕНТАР ЖУПА
- избирачи 7 368
- резиденти (попис 2021) 3 720
- полнолетни (проценка) 2 800
- гласале (прв круг) 1 245
Според избирачкиот список, право на глас во Центар Жупа имаат 7 368 граѓани. Но, во реалноста, едвај половина од регистрираните гласачи живеат во земјава. Според последниот попис, во општината живеат 3 720 резиденти, од кои, грубо, 80% се возрасни. Од нив, во првиот круг од претседателските избори гласале 1 245.
„Честопати викам дека ние како Општина Центар Жупа веќе сме во Европска Унија бидејќи по мои некои понови статистики некаде околу 80% од нашето население е во Европската Унија, веќе е прашање и кога се ќе биде слободно, останатото население дали би отишле во странство“,
вели градоначалникот Ибраим.
Градоначалникот Ибраим, кадар на Демократската партија на Турците, на своја кожа го има осетено недостатокот на гласачи, бидејќи во два наврати не можеше да стане градоначалник поради немањето цензус. На функцијата стапи по „трета среќа“, откако во текот на летото 2022 г. беше избран со помош на „печалбарите“ кои беа привремено дома.
„Перманентно, особено кога станува збор за претседателски или парламентарни избори излезеноста е уште пониска зошто нашето население претежно живее во странство и од тој аспект тука присутните бројот е многу низок и е во границите на овие бројки 17% или 18% излезеност и сметам дека од домашното присутно население околу 80% или 90% излегува и го дадоа гласот“,
смета првиот човек на Општината.
Значи, проблемот не е во политичката неактивност на овдешните граѓани, туку во големиот број запишани избирачи, кои го имаат ова право, но не го користат зашто живеат во странство.
Пред зборното место – угостителски објект средсело, па и во целото село, млади речиси и да нема. Општинското училиште кое своевремено било дом на илјада деца, сега брои едвај двесте. Возрасните кои живеат со пензиите кои ги стекнале во странство, во голем број се во поодминати години.
„Нема ни 15 или 20 души и се се стари, изнемоштени и болни луѓе, другото е се надвор. Ова Центар Жупа е бидена вистински турска демократска партија ама кога ќе беа избори овде црно од народ беше не се гледаше, а во денешно време да ти се плаче, жалосно е, нема ништо“,
Во селото Центар Жупа и ќе најдете по некого на улица за да прашате за мислење. Но, има места во општината што се речиси празни. Како што покажуваат податоците од првиот круг од претседателските избори:
Избирачки места со најниска излезеност во Центар Жупа
ИМ населено место излезеност
0565 Житинени 12,73%
0562/1 Голем Папрадник 13,23%
0560 Баланци 14,17%
На избирачкото место 0565, на кое гласаат жителите на селото Житинени, правото на глас искористиле само 12,73% од избирачите. Од избирачите запишани на избирачкото место 0562/1, Голем Пападник, излегле само 13,23%, а од село Баланци, избирачкот место 0560, излегле само 14,17%.
Дека оваа општина полека ја снемува и од мапата на политичарите, покажуваат повеќе знаци. Изборни плакати, кои биле залепени пред 4 години, се уште стојат на една руинираната куќа. Рекламите од овогодишните избори се ретки, ги видовме само на две или три локации – меѓу нив и пред штабот на Општинската организација на СДСМ.
Во април на гости им дошол само претседателскиот кандидат од „Европскиот фронт“, Бујар Османи.
Се се лаги тие, нема она што го обеќаваат да го дадат. Ние пензионерите чекаме од ден за ден да ги дигнат платите. Тие ќе ги дигнат платите ама цените на артиклите исти и поголеми се и ете го нивното дигање, за литар зејтин да гласаш, да шеташ.
„Сите кога одат велат едно, а потоа ниедно. И така народот се разочарува од сите партии“,
Според мештаните, излезеноста од 16,9% е и добра, со оглед на разочараноста на оние што останале. Поволна околност е тоа што токму во овој период дел од печалбарите биле дојдени дома. Се погодило во Италија да има неработни денови. Но, нема да биде така на 8 мај.
На втори треба сите да си одат за на работа, а се дојдени неколку луѓе за да ги отворат куќите, да видат. Али тоа ќе биде уште помалце сега, верувам дека ќе има помалку народ.
Во оваа општина, довербата од народот во првиот круг ја доби Бујар Османи со вкупно 448 гласови, што донекаде е и логично оти владејачката Демократска партија на Турците на овие избори е во коалиција со ДУИ. Но, веднаш зад него беше Стево Пендаровски со еден глас помалку или 447. Не беше многу далеку и Гордана Силјановска-Давкова со 306 гласови.
Двоцифрена бројка гласови имаа Арбен Таравари со 20 и Стевчо Јакимовски -11, додека Максим Димитриевски и Билјана Ванковска добија 7, односно 2 гласа.
Овие бројки се незначителни за изборниот процес кој продолжува на 8 мај. Но, се важни бидејќи на истиот пат се тргнати поголем дел од општините во земјава. На крајот на краиштата – што ќе и се на една земја избори, ако ниту има кој да гласа, ниту има што да се управува?