Поранешниот технички министер за внатрешни работи вели дека МВР има опремени кујни со најсовремени стандарди, а од друга страна услугата за набавка на храна ја доделува на приватна фирма. Дополнително, прашува и што ќе се случи со вработените готвачи и келнери во Министерството
МВР доделила милионски бизнис на приватна фирма за набавка на храна иако има свои кујни, обвини денеска поранешниот технички министер за внатрешни работи, Наќе Чулев, на прес-конференција од партиското седиште на ВМРО-ДПМНЕ.
„За прв пат во историјата, полициските службеници сместени во објектот во Ѓорче Петров и Центарот за обука во Идризово ќе консумираат храна која ќе биде набавена од страна на приватна компанија, основана токму со финансиска поддршка од владата на СДС“,
рече Чулев.
Тој на прес-конференцијата презентираше и договор за набавка на храна за Центарот за обука во Идризово, велејќи дека МВР ќе потроши до 440 милиони денари.
„Договорот е склучен помеѓу МВР на Оливер Спасовски и фирмата ’Индустри сервис‘, а со кој му се дава право на МВР да потроши до 440 милиони денари, односно 7 милиони и 150 илјади евра за исхрана. Се работи за бонбона бизнис со оглед дека само во Центарот за обука на дневна основа ќе се дистрибуираат нешто помалку од 1 000 оброци. Дали можеби ваков договор е склучен со компанијата ’Индустри сервис‘, затоа што истата и претходно имала бизнис релации со власта. Имено, истата добила грант од 10 милиони денари од Владата на СДСМ за изградба на својата фабрика“,
рече Чулев.
Тој тврди дека од друга страна во објектите на МВР има кујни со новонабавена најсовремена опрема за приготвување и складирање храна, која ги исполнува сите ХАСАП стандарди, па прашува зошто Министерството купувало ако планирало услугите за храна да ги додели на приватна фирма.
„Дополнително, се отвора и дилемата што ќе се случи со кадарот вработен во Министерството за внатрешни работи, десетици готвачи, готвачи и келнери кои до сега беа ангажирани да подготват храна за полициските припадници. Проценките и анализите на лица со долгогодишно искуство во делот на јавни набавки е дека на овој начин цената по оброк за МВР ќе биде многу повисока од актуелната што пак говори дека недомаќинско работење и несоодветно трошење на средствата на полицијата која истовремено кубури со неопходната основна опрема за соодветно извршување на тековните работни задачи и обврски“,
рече Чулев.