Од Алтернатива велат дека со внимание ја следат дебатата за евентуалните уставни измени, кои освен што се важни за продолжување на евроинтеграциите на Северна Македонија, сметаат и дека треба да ја отстранат, како што велат, непристојната квалификација за албанскиот јазик во Уставот со проценти. Но, од партијата на Гаши велат дека тоа треба да се направи со „алал“, а не со уцена
Ново барање за уставни измени. Партијата Алтернатива предлага уставен амандман со кој би се спречило да застаруваат кривичните дела на функционери за злоупотреба на службената положба.
Партискиот лидер, Африм Гаши, кажа дека политичари стапуваат на функција со скромен имотен статус, а потоа ја напуштаат позицијата како богаташи. Политиката ја нарече најпрофитабилен бизнис и смета дека ако функционерите не им служат на граѓаните, иселувањето нема да запре. Тој од партиската говорница денеска го соопшти предлогот за уставен амандман, за кој најави широка јавна дебата.
„Законите можат да имаат ретроактивно дејство дури и во случаите кои се однесуваат на застарување на кривичната одговорност за сторени злоупотреби од именувани или избрани лица при спроведување на јавните овластувања, со кои предизвикале штета на јавните средства, буџетските средства на централно и локално ниво и со таквите злоупотреби незаконски стекнале имотна корист… Ова подразбира и проширување на опфатот на конфискација на противправно стекнат имот впишан на трети лица. Со овој амандман ќе се даде уставна можност за ревизија на сите правосудни постапки за поранешни или сегашни избрани и именувани лица, кои се прекинати поради застареност на евентуалната кривична одговорност“,
изјави Гаши и кажа дека ова е заедничка грижа која не разликува етничка, верска и политичка припадност.
Од Алтернатива велат дека со внимание ја следат дебатата за евентуалните уставни измени, кои освен што се важни за продолжување на евроинтеграциите на Северна Македонија, сметаат и дека треба да ја отстранат, како што велат, непристојната квалификација за албанскиот јазик во Уставот со проценти, но и дека тоа да се направи со „алал“.
„Дебата за ова прашање треба да се води внимателно, бидејќи убедени сме дека во процесот на бришење на формулацијата ‘јазикот што го говорат повеќе од 20 проценти’ во Уставот, не смее да има победници и поразени. Народски кажано, треба да се направи со алал. Секој поинаков пристап кој ќе личи на уцена, популистички трик за дневнополитички поени, ќе направи обратен ефект. Не доликува на земја-членка на НАТО и земја со започнати преговори за членство на ЕУ низ ваков процес да прави рани кои тешко се лекуваат“,
рече Гаши.
Од партијата велат дека се спротивставувaат и на сите обиди за негирање на македонскиот јазик и идентитет и дека целосно ја разбираат чувствителноста на ова прашање.
„Затоа сакаме преку градење на заеднички пристап, заемно да ги решиме сите заеднички грижи“,
велат оттаму.