Видеото од местото на настанот покажува дека полицајците ја носат познатата активистка Тунберг подалеку од протестот
Најпознатата активистка за климатски промени во светот, Грета Тунберг, во вторникот (17 јануари) беше уапсена заедно со други активисти за време на протест против проширување на рудник за јаглен, но по проверката на идентитетот беше ослободена, јави Ројтерс.
Шведската климатска активистка беше приведена од германската полиција додека заедно со други активисти протестираше во отворениот рудник за јаглен на околу девет колометри од селото Луцерат во западна Германија.
Како што јави Дојче веле, според соопштение на германската полиција, за време на протестот, група демонстранти, меѓу кои и Тунберг, се оддалечиле од поголемата група на демонстранти и почнале да се приближуваат кон рудникот Гарцвајлер.
Поради тоа што од безбедносни причини не било дозволено приближување до работ на рудникот, германската полиција предупредила дека ако групата не се повлече од рудникот, тогаш ќе биде насилно отстранета.
„Грета Тунберг беше дел од група активисти кои се упатија кон рудникот. Меѓутоа, таа беше запрена и изнесена од нас со оваа група надвор од непосредната опасната зона за да се утврди нивниот идентитет“,
изјавил портпаролот на полицијата во Ахен, додавајќи дека еден активист скокнал во рудникот.
Видеото од местото на настанот покажува дека полицајците ја носат Тунберг подалеку од протестот.
Од минатиот викенд Тунберг протестира со активисти кои сакаат да го запрат уривањето на напуштеното село Луцерат со цел да се прошири рудникот за јаглен.
На протестот во саботата, таа им се обрати на околу шест илјади демонстранти кои протестираа кон селото, нарекувајќи го проширувањето на рудникот „предавство на сегашните и идните генерации“.
„Германија е еден од најголемите загадувачи во светот и треба да сноси одговорност“,
рече таа на протестот во саботата.
Селото кое се наоѓа помеѓу Дизелдорф и Келн ќе исчезне за да се овозможи проширување на голем отворен рудник за лигнит, еден од најголемите во Европа, управуван од германската енергетска компанија RWE.