Повикот Зајкова го упати преку видеообјава на социјалните мрежа Фејсбук, во која информира дека утрово била на нотар каде што заверила изјава дека ниту поседувала ниту поседува друго државјанство освен македонското
Претседателката на Либерално-демократската партија (ЛДП) и пратеничка во Собранието, Моника Зајкова, денеска ги повика свои колеги парламентарци да го следат нејзиниот пример и да дадат изјава на нотар дека освен македонското не поседуваат друго државјанство.
Повикот Зајкова го упати преку видеообјава на социјалните мрежа Фејсбук, во која информира дека утрово била на нотар каде што заверила изјава дека ниту поседувала ниту поседува друго државјанство освен македонското.
Потегот на пратеничката доаѓа откако пратеничката група на ВМРО-ДПМНЕ завчера во Собранието поднесе предлог-закон за изменување и дополнување на Законот за пратеници, кој предвидува пратеник во Собранието да може да стане лице што има само македонско државјанство.
Предлог-законот беше ставен на дневен ред на вчерашната седница.
„Во моментот излегувам од нотар каде што дадов изјава дека ниту сум поседувала ниту дека во моментов поседувам друго државјанство освен македонското, нотарски заверено и барам од сите пратеници да го направат истото, со цел да покажеме дека промените треба да почнат од секој од нас и дека навистина немаме двојни аршини“,
вели таа во видеото.
Покрај во видеозаписот, таа и во текстуалниот дел од објaвата ги повикува своите колеги пратеници да покажат дека законските измени не се популистички потег.
„Ајде колеги, сите на нотар со иста изјава – да се види дека е став а не популистички потег. Или сте за само со македонско државјанство или манипулирате. Јас не манипулирам, еве ја мојата нотарска изјава“,
напиша Зајкова во објавата.
Инаку, претседателката на ЛДП и пратеничка и вчера реагираше на предлогот на ВМРО-ДПМНЕ, велејќи дека ваквата одредба не треба да важи само за пратениците, туку и за сите избрани и именувани функционери.
Таа уште вчера ги повика своите колеги пратеници, но и сите функционери, да заверат изјава пред нотар дека немаат друго државјанство освен македонското, како и дека немале двојно државјанство во моментот кога стапиле на функцијата. Доколку се увиди дека некој имал двојно државјанство, рече Зајкова, треба веднаш да си поднесе оставка. Дополнително, таа ги повика пратениците кои се предлагачи на законските измени да побараат оставки од министрите што евентуално имаат или имале двојно државјанство во моментот на изборот.
Опозицискиот Социјалдемократски сојуз на Македонија (СДСМ) денеска информира дека нивната пратеничка група поднела предлог-измени на Законот за владата по скратена постапка, со кои се предвидува забраната за поседување двојно државјанство да ги опфати сите членови на извршната власт, вклучувајќи ги министрите и вицепремиерите.
Од партијата потенцираат дека нивната цел е воспоставување јасен принцип според кој истите правила мора да важат за сите избрани и именувани функционери, без какви било исклучоци.
Оттаму го критикуваат предлогот на ВМРО-ДПМНЕ за измени во Законот за пратениците, нарекувајќи го „уште една измама на власта“, бидејќи според опозициската партија предлогот на мнозинството е манипулативен оти така конципиран би важел дури од наредниот парламентарен состав, а не за актуелните пратеници.
Лидерот на СДСМ, Венко Филипче, вчера на прес-конференција, исто така, ги оцени предлог-измените на владејачкото мнозинство како „класична измама“, но рече дека социјалдемократите ќе дадат поддршка, а во текот на постапката преку амандмани ќе бараат законот да ги опфати и актуелните пратеници.