Тој во исказот пред судот детално ги опишуваше ЈУ-стандардите по кои оградата е градена во 2000 година, за проектот кој е од 1998 година, за измените, за квалитетот кој одговара на европските норми 13/17, кои тогаш не важеле, но денеска се применуваат во Европа
Заштитната ограда на автопатот Скопје-Тетово на делницата на местото на несреќата на автобусот на „Дурмо турс“ била во согласност со тогашните стандарди, освен навртката која служи за спојување на деловите, која е со нешто послаб квалитет, изјави вештак од областа на градежништвото на денешното рочиште за сообраќајката кај Ласкарци.
Тој во исказот пред судот детално ги опишуваше ЈУ-стандардите по кои оградата е градена во 2000 година, за проектот кој е од 1998 година, за измените, за квалитетот кој одговара на европските норми 13/17, кои тогаш не важеле, но денеска се применуваат во Европа.
Вештакот укажа на пропусти, кои генерално се при проектирањето – нема детали за столбот, дистанцерот и поставеноста на оградата во однос на автопатот, како и при изведувањето – недоволна притегнатост на оградата и нејзините делови. Исто така, тој посочи и на пропусти во одржувањето каде што е дозволена корозија и е запоставена.
Но тој беше дециден дека според сите анализи дури и да немало вакви пропусти, таа не би успеала да го задржи автобусот.
Според него, при увид на самото место е утврдено дека нема пропусти во изведбата на оградата и отстапувања од тоа што е предложено од изведувачот.
„Има отстапување во однос на геометријата на патот. Да биде подалеку од коловозот, да биде пониско или повисоко поставена“, изјави вештакот.
Процесот го води судијката Диана Груевска-Илиевска, а застапник на обвинението е јавниот обвинител Дарко Јакимовски.
За автобуската несреќа што се случи на 13 февруари годинава кај селото Ласкарци, во која загинаа 16 лица, а 37 беа потешко повредени, се обвинети шест лица.
Сопственикот на „Дурмо турс“, Дурмиш Белули, одговорниот за транспорт во формата Ремзи Мифтари и возачот на автобусот Маноел Трифуновски се товарат за сторени тешки дела против безбедноста на луѓето и имотот во сообраќајот, додека тројцата вработени во станицата за технички преглед Игор Ѓорѓиевски, Горан Дуковски и Јане Боварски за соучество во истото дело.
*Поврзана вест
(ВИДЕО) Една година по трагедијата кај Ласкарци: Погодените не се откажуваат од барањето правда