Поранешниот претседател на Собранието вели дека не е направен правен преседан со отповикувањето на одлуката за распуштање на претходниот парламентарен состав и со одложувањето на изборите, кои првично требаше да се одржат на 24 април, а тоа се случи дури на 11 декември
Поранешниот претседател на парламентот Трајко Вељаноски, во чиј мандат беа распишани па откажани претходните парламентарни избори, вели дека со овој чин не бил направен правен преседан. Тој појаснува дека тогаш првата одлука за распуштање на парламентот беше поништена со одлука на Уставниот суд.
Вељаноски, кој цели осум години, во три мандати, беше на чело на законодавниот дом, се огласи преку Фејсбук во контекст на најавата за одложување на годинешниве парламентарни избори, кои требаше да бидат вонредни и да се одржат на 12 април. Вељаноски нагласува дека, со оглед на развојот на настаните поврзани со ширење на пандемијата ковид-19, и тој е за одложување на изборите и нивно презакажување за период кога ќе биде извесно дека тоа нема да влијае на загрозување на здравјето на граѓаните.
„Овој статус решив да го напишам бидејќи деновиве слушам дека веќе имало правен преседан кога Собранието било распуштено, па се вратило во заседание, но вистината е сосема поинаква“,
објаснува Вељаноски, по што ги набројува своите аргументи зошто смета дека одлуката пред четири години, за одложување на изборите, била правно издржана.
- Прво, на 87. седница одржана на 18 јануари 2016 година се донесе одлука за распуштање на Собранието, која имаше одложено дејство, односно со примена од 24 февруари 2016 година.
- Второ, бидејќи тогашната опозиција не се согласуваше да има избори (иако беа договорени во Пржино), имаше најава од опозицијата дека нема да учествува на избори. Поради тоа, пред да стапи примената на одлуката за распуштање на Собранието на 95. седница, одржана на 23 февруари 2016 година, Собранието донесе одлука за измена на одлуката за распуштање, со тоа што примената наместо на 24 февруари да биде на 7 април 2016 година.
- Трето, Собранието, согласно со изменетата одлука, на 7 април 2016 година се распушти и се донесе решение за одржување на избори на 5 јуни 2016 година.
- Четврто, откако се распушти Собранието и се донесе решение за избори, Уставниот суд со одлука У.бр.104/2016 во мај 2016 година ја поништи одлуката за распуштање на Собранието и врз основа на таа одлука на Уставниот суд, Собранието продолжи да работи се до 17 октомври 2016 година.
„Според ова, Собранието не направи правен преседан, туку Уставниот суд ја поништи одлуката за распуштање, а за мотивот и образложението на одлуката на Уставниот суд во друга пригода“,
наведува Вељаноски.
Тој се обрати на Фејсбук пред почетокот на денешната лидерска средба, на која треба да се најдат модалитети за одложување или откажување на 10. парламентарни избори, кои беа закажани како вонредни, поради што и се распушти парламентот. Според информациите, една од опциите што се разгледува е да се состане парламентот и да ја поништи одлуката за негово распуштање.