Кандидатурата на Силјановска-Давкова без граѓански потписи денеска беше и една од главните теми во преписките и прозивките меѓу политичките ривали СДСМ и ВМРО-ДПМНЕ. Портпаролката на СДСМ, Богданка Кузеска, на прес-конференција обвини „ДПМНЕ нема собрано валидни, законски потписи за нивната кандидатка за претседател на државата, додека пак од партијата која застана зад кандидатурата на Силјановска-Давкова, темата, која според нив ја креираат СДСМ и Пендаровски, ја оценија како нереална и обид да се одбранат од поразот што ги очекува на изборите
Штета што Прочка помина, затоа што сега ќе мораа да бараат прошка од оние наводни 25 000 граѓани кои се потпишуваа за претседателска кандидатура, а чии потписи завршија на буниште. Вака кандидатката на Левица за претседател на државата, Билјана Ванковска, го коментира тоа што кандидатурата на нејзината противкандидатка поддржана од ВМРО-ДПМНЕ, Гордана Силјановска-Давкова, до Државната изборна комисија (ДИК) е поднесена само со потписите на 30 пратеници, а без собраните над 20 000 граѓански потписи.
Информацијата утрово за „360 степени“ ја потврдија од ВМРО-ДПМНЕ, од каде што велат дека кандидатурата е без граѓанските потписи затоа што сметаат дека станува збор за протоколарна, односно техничка работа.
„Не разбирам како е можно ’голема’ и ’народна’ партија да си дозволи луксуз од процесот на собирање потписи да направи шоу за еден ден, да натера луѓе да чекаат дисциплинирано во редици пред канцеларии на ДИК или кај нотари… Чуму? Како е можно она што беше опишано како „човечки и граѓански пркос“ и давање легитимација одеднаш да стане неважна дреболија во процесот на кандидирање зад кој сега наводно стојат само пратенички потписи? Велам наводно, бидејќи уште сакам да верувам дека она на 3 март не бил само обичен политички блеф и спектакл“,
напиша Ванковска на социјалната мрежа Фејсбук.
Прашањето за поднесената кандидатура на Силјановска-Давкова без граѓанските потписи го отворија од таборот на нејзиниот противкандидат Стево Пендаровски, кој е поддржан од СДСМ, од каде што прашаа зошто кандидатката поддржана од ВМРО-ДПМНЕ се одлучила на ваков потег и дали воопшто ги собрала потребните граѓански потписи како што тврдеа од партијата.
„Пред само две недели ВМРО-ДПМНЕ се фалеше дека за Гордана Силјановска-Давкова се потпишале најмногу граѓани, се споменуваа бројки од 20 000, 25 000 потписи, па и повеќе. Но, на крајот, кандидатурата на Силјановска-Давкова беше поткрепена само со триесетина потписи на пратеници од редовите на ВМРО-ДПМНЕ“,
се наведува во соопштението испратено од „Претседател за сите нас – Стево“.
Кандидатурата на Силјановска-Давкова без граѓански потписи денеска беше и една од главните теми во преписките и прозивките меѓу политичките ривали СДСМ и ВМРО-ДПМНЕ.
Портпаролката на СДСМ, Богданка Кузеска, на прес-конференција обвини „ДПМНЕ нема собрано валидни, законски потписи за нивната кандидатка за претседател Гордана Силјановска Давкова“ и кандидатурата во ДИК ја поднела со потписи на пратеници, а не со потписи од граѓани.
„Очигледно, ДПМНЕ како што ги лажира анкетите, сакала да ги лажира и потписите, па кога разбрале дека ќе се проверува легалноста на секој даден потпис не ги поднеле. Ова е можеби за прв пат ДПМНЕ да нема собрано потписи зад својот кандидат, но тоа и не е толку важно. Клучното е дека ниту ДПМНЕ ниту Гордана Силјановска ја немаат поддршката од граѓаните. Граѓаните не сакаат враќање назад и изолација, не се спремни да поддржат антиевропски политичари“,
рече Кузеска, која во тој контекст додаде, дека на граѓаните не им треба претседател кој ќе биде продолжена рака на ‘Белата палата“ (седиштето на ВМРО-ДПМНЕ н.з.) и реприза на поранешниот претседател на државата Ѓорге Иванов.
Од партијата која застана зад кандидатурата на Силјановска-Давкова, пак, темата, која според нив ја креираат СДСМ и Пендаровски, ја оценија како нереална и обид да се одбранат од нивниот неуспех и поразот кој ги очекува на изборите.
„Свесни сме за интенцијата на Пендаровски и СДС да продолжат со креирање на теми кои се надвор од реалноста и ова е уште доказ за нивната единствена желба да го затскријат својот неуспех и пораз кои ги очекува“,
се наведува во реакцијата на ВМРО-ДПМНЕ на прес-конференцијата на Кузеска.
Оттаму, како и претходно во одговорот за „360 степени“, велат дека поднесувањето на кандидатурата за претседател е технички процес додавајќи дека за професорката и актуелна пратеничка во Собранието имало историски најголем одзив од граѓани при собирањето на потписи за нејзината кандидатура.
„Тоа е она што е најголем најголема блока за Пендаровски и СДС. Поддршка од граѓаните е јасна и недвосмислена, а СДС и Пендаровски во истата ќе се уверат на 24 април и 8 мај. Му препорачуваме на Пендаровски барем во неговите последни денови од мандатот да ја напушти неговата најсилна карактеристика – озборување и пласирање на невистини во јавноста“,
велат од ВМРО-ДПМНЕ.
За влез во трката за претседател на државата, според Изборниот законик, се потребни најмалку 10 000 граѓански потписи или 30 потписи од пратеници во Собранието на Република Северна Македонија. Најголем дел од кандидатите за шеф на државата се квалификуваа преку собирање граѓански потписи бидејќи немаат доволен број пратеници во Собранието за тоа да го направат со нивна поддршка. Иако тоа не претставуваше пречка за кандидатите на ВМРО-ДПМНЕ и СДСМ, Гордана Силјановска-Давкова, односно Стево Пендаровски, тие, сепак, решија да собираат и потписи.
Собирањето потписи траеше од 23 февруари до 8 март.
Покрај нив двајца, во трката за претседател, преку собирање потписи, се квалификуваа и Бујар Османи (ДУИ), Арбен Таравари (Коалиција „Вреди“), Билјана Ванковска (Левица), Стевчо Јакимовски (ГРОМ) и Максим Димитриевски (Движење ЗНАМ). Неопходниот број граѓански потписи не успеаја да го соберат осуммина кандидати.
Државната изборна комисија сега треба да одржи седница на која ќе ги разгледа и потврди поднесените кандидатури, а најдоцна до 28 март треба да се утврди и редоследот на потврдените кандидати на гласачкото ливче.
Претседателските избори се закажани за 24 април, а доколку ниту еден од кандидатите не го добие потребниот број гласови (мнозинство од запишаните во Избирачкиот список), вториот круг ќе се одржи две недели подоцна, односно на 8 мај, во кој ќе влезат двајца кандидати со најголем број освоени гласови во првиот круг.
На 8 мај се закажани и изборите за нов состав на Собранието на Република Северна Македонија.
На претседателските избори, според ДИК, ќе гласа и дијаспората од дваесетина држави во кои се пријавиле доволен број граѓани со право на глас. Иселениците, пак, нема да гласаат на парламентарните избори затоа што бројот на пријавени граѓани за гласање на овие избори е далеку под потребните 5 355 гласачи.