Клиниката за трансфузиологија отстапи два фрижидери на -80 степени за чување на вакцината на „Фајзер“, а во земјава викендот стигнаа уште два фрижидери на -80 степени. До крајот на месецот дополнително ќе пристигнат уште три
Министерот за здравство Венко Филипче и неговиот српски колега Златибор Лочнар во наредните денови ќе ги договорат деталите околу постапката за испорака на 8 000 вакцини од производителот „Фајзер“, кои Србија ќе ѝ ги даде на државава, соопшти Министерството за здравство.
Премиерот Зоран Заев утрово соопшти дека разговарал со претседателот на Србија, Александар Вучиќ, кој одговорил на нашето барање да добиеме извесна количина вакцини од набавката на Србија, кои, како што рече Заев, ќе ги платиме по набавната цена.
„Симбол на оваа здравствена криза е солидарноста, и Министерството за здравство изразува благодарност до Република Србија и српскиот народ за овој пријателски чин“,
велат од МЗ во соопштението.
Од Министерството, исто така, посочуваат дека во финална фаза е и процесот на директна набавка од истиот производител и согласно договорената динамика, во февруари преку „Фајзер“ ќе пристигнат 5 850 дози од вакцината, а по 17 500 дози во март и април.
Клиниката за трансфузиологија отстапи два фрижидери на -80 степени за чување на вакцината на „Фајзер“, а во земјава викендот стигнаа уште два фрижидери на -80 степени. До крајот на месецот дополнително ќе пристигнат уште три фрижидери за вакцината на „Фајзер“.
Во февруари се очекуваат и вакцините преку механизмот Ковакс, за кои е направена уплата и е обезбедена гаранција. Вкупната количина на вакцина преку овој механизам за нашата држава изнесува 833 000 дози.