Изменети траси, како што информираат од ЈСП, ќе имаат линиите 7, 8, 15, 15А, 18, 19, 21А, 26, 29, 59, и 118
Дел од автобусите на ЈСП „Скопје“ утре во периодот од 9 до 12 часот ќе сообраќаат по изменет режим од вообичаениот. Причина за изменетиот режим е одржување генерална проба во врска со 30. Министерски совет на ОБСЕ кога се очекува неколку сообраќајници да бидат затворени.
Изменети траси, како што информираат од ЈСП, ќе имаат линиите 7, 8, 15, 15А, 18, 19, 21А, 26, 29, 59, и 118.
Линии 8 и 15А ќе сообраќаат преку мостот „Гоце Делчев“ и наместо по булевар „Илинден“, ќе продолжуваат по булевар „Партизански одреди“.
Автобусите со број 7, 15, 19, 26, 29 и 59 наместо на крајните терминали во населбите Карпош 3 и Карпош 4, ќе продолжуваат по булевар „Партизански одреди“, па десно по улица „Никола Парапунов“ (кај стара телевизија) каде што нема да чекаат време, туку веднаш ќе продолжуваат десно по булевар „Илинден“, па десно по улица „Љубљанска“, па со лево свртување ќе продолжуваат по булевар „Партизански одреди“.
Линии 18, 21А и 118 од булевар „Крсте Петков Мисирков“ ќе продолжуваат право кон Бит пазар, потоа по булевар „Никола Карев“ (кај Пластичарска улица) и од кај Момин поток ќе продолжуваат по сопствените редовни траси до крајните стојалишта.
Посочениот режим, од ЈСП велат дека ќе важи и во двете насоки на движење.
Од Министерството за внатрешни работи информираат дека утре, од 9 до 12 часот, ќе има посебен режим на сообраќај, а затворени за сообраќај ќе бидат булеварот „Илинден“ од крстосница со булеварот „Св. Климент Охридски“ до крстосница со улицата „Љубљанска“ и булеварот „8 Септември“ од крстосница со улицата „Скупи“ до крстосница со булеварот „Партизански Одреди“.
Од МВР апелираат до граѓаните да ги почитуваат наредбите што ги издаваат полициските службеници.
Променет возен ред автобусите на ЈСП ќе имаат и на 30 ноември за време на одржување на Министерскиот самит на ОБСЕ. Во четврток, автобусите ќе возат по саботен возен ред, а сите билетарници и центри за персонализација нема да работат. Ден претходно, пак, на 29 ноември од ЈСП велат дека јавниот превоз ќе сообраќа вообичаено, по зимен делничен возен ред, а билетарниците и центрите за персонализација ќе работат од 6:30 до 13 часот.
Жичницата, информираат од ЈСП, сите денови ќе работи вообичаено, од 10 до 17 часот.